Ойуур баһаара
Бэҕэһээ, бэс ыйын 13 күнүгэр, Мэлдьэхси нэһилиэгин сиригэр-уотугар күнүс 11 чаас 30 мүн. ойуурга баһаар турбутун туһунан иһитиннэрии киирбит. Тута кэриэтэ социальнай ситимнэринэн ойуурга турбут уоту видеоҕа уһулбуттара тарҕаммыта. Оччолорго уот турбут иэнэ 1,2 гаа этэ.
Бу уоту бохсууга уопсайа 18 киһи, “Якутлесресурс» САТ Мэҥэ Хаҥаластааҕы филиалын үлэһиттэрэ 5 тиэхиникэнэн тиийэн үлэлии сылдьаллар. Мэлдьэхси нэһилиэгин олохтоохторуттан эр дьон хомуллан ойуурга уоту умулларыыга саҕалааһыныгар күүс-көмө буолбуттара. Миэстэтигэр балаһыанньаны үөрэтэн баран, “Якутлесресурс» үлэһиттэрэ бэйэлэрин күүстэринэн умулларарга быһарыныы ылыммыттара. Онон дьону хомуйуу тохтотуллубута.
Бэҕэһээ киэһэ 23 чааска 18 гаалаах сиргэ ойуурга турбут уот тула эргитиллибитэ. Бүгүн күнүс 15.30 чааска улуустааҕы биир кэлим дьуһуурунай сулууспа салайааччыта Афанасий Максимов иһитиннэрбитинэн, саҥа сибидиэнньэ киирэ илик. Эргитиллибит сиргэ уоту умулларыыга үлэ салҕанан барар.
Улууспут олохтоохторун бука барыгытын баһаартан сэрэхтээх буолуоҕуҥ, ойуурга сэрэхтээхтик сылдьыаҕыҥ диэн ыҥырабыт. Ыксаллаах быһыы-майгы тахсар түгэнигэр улуустааҕы биир кэлим дьуһуурунай диспетчерскэй сулууспатыгар 89659980604, 8(411-43) 47-880 эбэтэр 112 нүөмэринэн тута биллэрэҕит.