Оройуон баһылыгын быйылгы отчуоттуур мунньаҕа Мэлдьэхси нэһилиэгинэн түмүктэннэ.
Успуорт саалатыгар 45 киһи муһунна. Баһылык Валерий Никифоров мунньаҕы салайан ыытта.
Былырыын нэһилиэктэн 14 боппуруос туруоруллубутуттан 4 толоруллубут, 9 үлэҕэ сылдьар. Мэлдьэхсилэр тыын боппуруостара ‒ хас саас, күһүн ахсын массыына сырыытын хаайар суол, күн ахсын кэриэтэ тымныыны тулуйбакка арахсар электроуот, кулууп өрөмүөнэ, эдэр исписэлиистэргэ олорор дьиэ тутуута, суолу аспааллааһын, байыаннай дьайыыга сылдьааччыларга туох көмө көрүллэрэ.
Эдэр бэтэринээр тоҕо быраастарга эрэ көмө көрүллэрин туһунан боппуруоһу туруорда. Тыа хаһаайыстыбатыгар үлэлиир эдэр исписэлиистэргэ туох көмө баарын, реабилитацияҕа инбэлиит оҕолорго кубуота, сүөһү ахсааныгар көрүллэр харчы, уу таһар массыынанан хааччыллыы о.д.а. туһунан ыйытыылар киирдилэр. СӨ үтүөлээх тириэньэрэ Василий Куприянов иитиллээччитэ Прокопий Говоров сүүс харахтаахха гроссмейстер аатын ситиһэригэр элбэх күрэхтэһии, айан ирдэнэринэн үбүнэн-харчынан көмөнү, дуобат лааҕыра тэриллиэхтээх оскуолатыгар интэринээккэ миэстэ эбиллиитин, ону тэҥэ интэринээккэ душ, туалет өрөмүөнүн туруоруста.
Надежда Андросова тутуллубута отут сыл буолбут таас оскуола өрөмүөннэнэрэ уолдьаспытын туруоруста.
Владимир Шарин нэһилиэктэргэ патриотическай тыыҥҥа иитиини күүһүрдэргэ эттэ.
Мэлдьэхси нэһилиэгэр быйыл Култуура сылын биллэрбиттэр, бэлиэ сылга култуура киинин үлэҕэ киллэрэргэ эрэллээхтэр.
Елизавета Неустроева.
