Сааскы күн сылааһын айхаллаан Мэлдьэхси дьоно-сэргэтэ эмиэ атын нэһилиэктэр курдук үлэ үөһүгэр сылдьабыт.
Бүгүн, кулун тутар 15 күнүгэр, быыбар эппиэттээх күннэрэ саҕаланнылар. Бүгүн күн бастакы аҥарыгар 12 чааска диэри номнуо олохтоохтор 45 бырыһыаннара көхтөөхтүк быыбарга кытыннылар.
Нэһилиэкпитигэр саҥа биэлсэр-акушер пууна, хаарбах туруктаах дьиэттэн көһөрүү бырагырааманан элбэх кыбартыыралаах таас дьиэ тутуллаары сыбаайалара аҕалылынна.
Быйыл 2024 сыл нэһилиэкпитигэр баһылыкпыт Валерий Никифоров Култуура уонна айылгы сылынан биллэрбитэ, ол чэрчитинэн араас элбэх тэрээһиннэр былааннаналлар.
Мэлдьэхси эр дьоно түмсэн байыаннай дьайыыттан уоппускаҕа кэлэ сылдьар уолаттарбытын кытта көрүстүлэр. Этэҥҥэ сылдьыҥ диэн Зиновий Игнатьев алҕаата, харысхаллары туттартаата. Нэһилиэкпит эр дьоно субуотунньуктаан саха быһахтарын оҥорон бэлэх ууннулар.
Кулун тутар 17 күнүгэр ырыа, хомус, кыл кылыһах төрүт дорҕоон тыаһыгар дьоммут ис санааларын сааһылыыр, туруктарын бөҕөргөтөр сыаллаах, байыаннай дьайыы кыттыылаахтарын төрөппүттэригэр, чугас ыкса дэриэбинэбит дьонугар сынньалаҥ киэһэтэ тэриллэр. Ыалдьыттарынан норуот маастара Руслан Габышев, култуура туйгуна Элеонора Соколова, аан дойду виртуоз хомусчута бэйэбит кыыспыт Варвара Степанова‒ Арчыына буолуохтара.
Кулун тутар 20 күнүгэр улуустааҕы Аҕа күрэҕэ биһиги нэһилиэкпитигэр ыытыллыаҕа.
Куолун тутар 23 күнүгэр Дьокуускай куоракка кулууппут үлэҕэ киллэриллэригэр көмө көрдүүр сыаллаах Мэлдьэхситтэн төрүттээх, олорон, үлэлээн, үөрэнэн ааспыт биир дойдулаахтарбытын кытта көрсөн дьоро киэһэ ыытыахпыт. Дойду аһын атыылыыр дьаарбаҥкалаах, уран уустарбыт быыстапкалара туруоруллуоҕа уонна талааннаах ыччат дьоммут, дьиэ кэргэттэрбит эҕэрдэ кэнсиэрдэрэ былааннанар.
Култуура киинэ биир дойдулаахпыт, алгысчыт, үҥкүүһүт, настаабынньык Д.Д.Попов‒Хобочоон үлэлээбит Кыыл Уола‒Сергей Зверев аатынан үҥкүү тыйаатырын уонна Мэлдьэхсигэ төрөөбүт үтүөлээх артыыс А.Г.Кривогорницын аатын сүгэр култуурабыт киинэ төрөөбүтэ 80 сылын көрсө кини төрүттэспит, үлэлээбит Ньурба норуодунай тыйаатырыгар уопут атастаһа дэлэгээссийэнэн бараары сылдьабыт.
Саамай нэһилиэкпит дьоно, ыччата баҕарар баҕабыт ‒ кулууппут үлэҕэ киллэриллэн ньир бааччы үлэлиирэ буолар. Онон биир дойдулаахтарбытын, үлэлээн, үөрэнэн ааспыт дьоммутун бу дьыл кулун тутар 23 күнүгэр киэһэ 5 ч. «Киэҥ Мэлдьэхси ыҥырар» аахсыйа тэрээһиммитигэр М.Н.Жирков аатынан музыкальнай колледж саалатыгар бары кэлиэххит диэн долгуйа эрэнэ күүтэбит, ыҥырабыт! Бэрт истиҥ-иһирэх алтыһыы буолуо диэн мэктиэлиибит!
Матрена Сыромятникова.