Мэлдьэхси нэһилиэгэр сайыны көрсүү сиэрэ-туома Суола үрэх үрдүгэр оҕолор таптаан ааттыыр Үөттээх диэн сиргэ ыытылынна.
Үрдүк Айыыларга далбар хотуттар сүгүрүйэн, айах тутан, аал уоту аһатан көрдөстүбүт. Аан Алахчын Хотуну аар хатыҥы айылҕа дьүһүнүн курдук өҥнөөх таҥаһынан ситиигэ саламанан симээтибит. Үрүҥ илгэнэн быыппаҕынан, арыылаах алаадьынан күндүлээтибит, аар хатыҥ тула оһуокайдаатыбыт. Мэлдьэхси эр хоһууннара бэтэрээннэргэ кус бэлэхтээбиттэрин, сынньалаҥ киин үлэһиттэрэ миин буһаран, мунду соркуойдаан, арыылаах саламаат, алаадьы астанан, сандалыга ыҥыран күндүлээтилэр, маанылаатылар. Кэлбит дьон сүргэлэрэ көтөҕүллэн, үөрэн-көтөн тарҕастылар. Бултаабыт уоланнарга Байанайдара тосхойо турдун диэн махталларын тиэртилэр.
