Мэлдьэхси дьоно кулууба суох олорбуппут үһүс сылыгар баран эрэр. Кулууп дьиэтэ суоҕа куһаҕанын оҕотуттан аҕам дьоҥҥо тиийэ бары өйдүүбүт. Суһаллык дьиэбит чөлүгэр түһэн нэһилиэкпит тэбэр сүрэҕэ буоларыгар туохтааҕар да баҕарабыт, хамсана сатыыбыт. Үлэ тахсарыгар түөлбэлэр олохтоохторо, оскуолабыт үрдүкү кылааһын үөрэнээччилэрэ, учууталлара, үлэһиттэрэ, тэрилтэлэрбит улахан субуотунньукка кытыннылар. Нэһилиэнньэ көҕүлээһинин бырагырааматынан чуолаан муоста оҥоруу, сылааһырдыы үлэтэ буоларынан, бастаан бэйэбит көтүрүөхтээхпит, сиэмэн ыраастааһына бүтүөхтээх.
Иккитэ төхтүрүйэн федеральнай судаарыстыбаннай бырагыраамаҕа сайаапка биэрэн көрдүбүт да аккаас кэлэ турар, үһүстээн биэрэр санаалаахпыт. Нэһилиэк дьокутаата Светлана Иванова Ил Дархан быһа эпииригэр кулууп боппуруоһунан ыйытыы биэрбитэ. Ол чэрчитинэн улуус баһылыгар Дмитрий Тихоновка киирэ сылдьыбыта. Ааспыт нэдиэлэҕэ хапытаалынай тутуу управлениетын үлэһиттэрэ кэлэн балаһыанньаны билсэн барбыттара, салгыы ааҕар-суоттуур үлэлииргэ докумуоннар оҥоһуллуохтаахтар. Нэһилиэк баһылыга Валерий Никифоров, нэһилиэкпит кураатара Виталий Пестряков туруорсууларынан, ыҥырыыларынан сомоҕолоһуу субуотунньуга буолан ааста. Киин муостатын аннынааҕы сиэмэнин (стяжкатын), кумаҕын таһырдьа таһаарыыга көхтөөх үлэ барда. Субуотунньукка Мэлдьэхси нэһилиэгин дьаһалтата, Дьоруой Попов аатынан сопхуос түөлбэтин нэһилиэктэрин дьаһалталара, Хорообут, Бэдьимэ, Сыымах, Төхтүр кулууптарын үлэһиттэрэ, улуустааҕы успуорт управлениета, «Парус» успуорт комплекс, оҕо успуордун оскуолатын үлэһиттэрэ көмөлөстүлэр. Маннык түмсүүлээх, өрүү көмөҕө кэлэр дьонноох буоламмыт ханнык да ыарахаттары кыайыахпыт.
Матрена Сыромятникова.
