Тохсунньу 20 күнүгэр Мэҥэ Хаҥалас улууһун баһылыга Дмитрий Тихонов 2023 сыллаах үлэтин отчуота күн иккис аҥарыгар Мөҥүрүөн нэһилиэгэр Я.П. Кычкин аатынан култуура киинигэр улууспут гимнинэн саҕаланна. Манна улуус управлениеларын, тэрилтэлэрин салайааччылара, Ил Түмэн дьокутаата, Сис кэмитиэт бэрэссэдээтэлэ Андрей Находкин, Уус Алдан Бороҕоннооҕу уокуругуттан Ил Түмэн дьокутаата Геннадий Васильев, улууспут дьокутааттарын сэбиэтин бэрэссэдээтэлэ Иннокентий Андросов кыттыыны ыллылар.
Нэһилиэк баһылыга Юрий Александров киирии тылыгар дьонун-сэргэтин туруорсар боппуруостарынан көхтөөхтүк кытталларыгар ыҥырда. Улуус баһылыга ааспыт сылга туох үлэ-хамнас барбытын нэһилиэнньэҕэ сиһилии сырдатта.
Чааһынай кэпэрэтиип тэринэргэ туох көмө баарын, баһаарынай чааска эбии штат, биэлсэр-акушер пуунугар аптека арыллара, медсиэстэрэ көрүллэрэ наадаларын, өрөспүүбүлүкэтээҕи трасса аспаалланарын, тротуар оҥоһулларын, оҕолор оскуоланы “А”, “В” категориялары ылан тиэхиньикэни ыытар бырааптаах бүтэрэллэригэр, 70-с сыллардааҕы сууллаары турар уот остоолболорун кабельга көһөрөргө, нэһилиэк үүнэр-сайдар кэскиллээҕинэн балыыһаны кэҥэтэргэ туруорсар, о.д.а. боппуруостар киирдилэр.
Оҕо уһуйаанын сэбиэдиссэйэ Мариана Ченянова, үлэ бэтэрээнэ Иннокентий Находкин, нэһилиэк дьокутаата Константин Марков, бочуоттаах сынньалаҥҥа олорор Иван Кычкин, урбаанньыт Александр Протопопов, оскуола дириэктэрэ Антонина Находкина, үлэ бэтэрээннэрэ Егор Марков, Ульяна Андросова нэһилиэк кыһалҕалаах боппуруостарын тиэртилэр.
Дмитрий Тихонов анал байыаннай дьайыыга сылдьар биир дойдулаахтарбытыгар тиэрдиллэр көмөлөргө көхтөөх кыттыыны ылалларыгар Матта олохтоохторугар махталын тиэртэ.
Олохтоохтор баһылык үлэтин үчүгэйинэн сыаналаатылар, отчуоту 45 киһи иһиттэ.
Марелла Баишева.
