Өрөспүүбүлүкэбит бары улуустарыгар, нэһилиэктэригэр үтүө үгэскэ кубулуйбут Олоҥхо дэкээдэтэ сыллата киэҥ далааһыннаахтык ыытыллар. Биһиги улууспут бары нэһилиэктэригэр култуура кииннэригэр, оскуолаларга, уһуйааннарга Олоҥхо күнүн уруйдуур тэрээһиннэр ыытыллаллар.
Сэтинньи ый 7 күнүгэр Майаҕа «Дьол түһүлгэтэ» уопсастыбаннай кииҥҥэ «Уруйдан, Улуу Олоҥхо, Манчаары дойдутугар» олоҥхо ыйын чэрчитинэн «Олоҥхо олохсуйбут түһүлгэтэ» тэрээһин ыытылынна.
Бу күн түһүлгэҕэ түөрт көлүөнэ олоҥхону толорооччулар кыттыыны ыллылар.
«Кэнчээри» оҕо уһуйаанын “Сүүтүкчээн” алын бөлөх иитиллээччитэ 3 саастаах Аливия Слепцова (салайааччы Луиза Иванова, иитээччи Елена Березкина) П.А.Ойуунускай «Дьулуруйар Ньургун Боотур» олоҥхотуттон быһа тардыыны толордо.
«Мичил» оҕо уһуйаанын бэлэмнэнии бөлөҕүн оҕолоро Алина Холмогорова, Айна Кириллина, Айсиэна Константинова (салайааччы Евдокия Иванова) Олес Максимов «Үрүҥ Дьоруо аттаах Быырай бухатыыр» олоҥхотуттон быһа тардыыны толорон иһитиннэрдилэр.
Улуустааҕы, өрөспүүбүлүкэтээҕи «Олоҥхо дойдуһун оҕотобун» олоҥхо толоруутун кыра кылаастарга кылаан бирииһин кыайыылааҕа, «Кэрэли» эбии үөрэхтээһин киинин уһуйуллааччыта Айдын Жирков (салайааччы Анастасия Слепцова) Н.И.Степанов-Ноорой «Күн Эрили» олоҥхотуттан быһа тардыыны толордо.
Н.И.Степанов-Ноорой «Күн Эрили» олоҥхотуттан быһа тардыыны Догдоҥо орто оскуолатын үөрэнээччилэрин «Ноорой сиэннэрэ» бөлөҕүн (салайааччылар Ульяна Максимова, Валентина Кривошапкина) толоруутугар иһиттилэр.
«Олонхо Баттл» 2023 с. телевизионнай күрэх муҥутуур кыайыылааҕа, олоҥхоһут Станислав Иванов бэйэтэ суруйбут «Хорсун-хоодуот Хатан Боотур» олоҥхотуттан быһа тардыыны толордо.
«Айыллыат» олоҥхону толорооччулар түмсүү (салайааччы Евдокия Семенова, уус-уран салайааччы Мария Иванова) В.О.Каратаев «Модун Эр Соҕотох» олоҥхотуттан быһа тардыыны толордулар.
Өбүгэлэрбит барахсаттар түҥ былыргыттан илдьэ кэлэн, биһиэхэ күндү бэлэх гынан туттарбыт олоҥхобутун ити курдук кыра оҕотуттан улаханыгар диэри толороллоро инникитин да норуот эпоһа умнуллубакка сайда, үйэтитиллэ турарыгар эрэли үөскэтэр.
Тэрээһин кыттыылаахтарын Майа дьаһалтатын аатыттан баһылыгы солбуйааччы Вячеслав Санников эҕэрдэлээтэ уонна Станислав Иванов өрөспүүбүлүкэтээҕи «Олоҥхо Баттл» күрэххэ чаҕылхай кыайыытын бэлиэтээн саха быһаҕын бэлэх туттарда.
