Бүгүн, сэтинньи 18 күнүгэр, Майа сэлиэнньэтин киинигэр сарсыардаттан олохтоохтор тиэтэйэ-саарайа кэлиилэрэ-барыылара үксээтэ, муусука, ырыа-тойук тардылынна.
«Кыталык» уопсастыбаннай кииҥҥэ сыллата баччаларга үгэс быһыытынан ыытыллар «Идэһэ» атыы-эргиэн дьаарбаҥкаҕа саха киһитэ уһун кыһын устата сөбүлээн сиир аһа иһирдьэнэн-таһырдьанан дэлэйдик тардылынна. Улууспут нэһилиэктэриттэн биирдиилээн үлэһит дьон, агрооскуолалар, хаһаайыстыбалар көрөн-истэн төлөһүппүт сүөһүлэрин, сылгыларын этэ, үрүҥ ас, бурдук ас арааһа, битэмиининэн баай сир, оҕуруот аһыттан оҥоһуллубут соҕотуопка эгэлгэтэ, бэл, бэйэ ыҥырыатын мүөтэ о.д.а. ас-үөл хамаҕатык атыыланна. Күн-дьыл хаһааҥҥытаҕар да олус сылаас, -5-7 эрэ кыраадыс туран биэрэн, дьон атыыны-тутууну астына-дуоһуйа көрдө, ыксаабакка атыыласта.
Киин сиргэ олорооччулар кыһыҥҥы хаһаас астарын булунар, оттон үлэһит дьон оҥорон таһаарбыт бородууксуйаларын батарар күүтүүлээх тэрээһиннэринэн, үлэһит киһи бырааһынньыгынан мустубут дьону муниципальнай оройуон баһылыга Дмитрий Тихонов уонна Майа сэлиэнньэтин баһылыга Алексей Неустроев эҕэрдэлэээтилэр. Олохтоохторго итиэннэ эти-үүтү дэлэтэр хаһаайыстыбаларбытыгар үчүгэй бэлэмнээх киирэн кыстыгы этэҥҥэ туоруулларыгар баҕардылар.
Улуустааҕы тыа хаһаайыстыбатын управлениетын начаалынньыгын солбуйааччы Александр Борисов биһиэхэ иһитиннэрбитинэн, “Идэһэ-2023” дьаарбаҥкаҕа Чыамайыкы, Бэдьимэ, Төҥүлү, Нөөрүктээйи, Хорообут о.д.а. нэһилиэктэртэн – таһырдьа 33 хаһаайыстыба, киин иһигэр 2 агрооскуола, «Алаас ыала» түмсүү, 7 хаһаайыстыба бэйэлэрэ оҥорон таһаарбыт бородууксуйаларын кэлэн атыылаатылар.
Икки хаһаайыстыба эт эрбиир тэриллэрин аҕалан, дьоҥҥо ылар эттэрин кырбастыыр өҥөнү оҥорбуттара итиэннэ уопсай ыйааһын баара атыылаһааччыларга табыгастаах буолла. Ол эрэн, дьаарбаҥкаҕа кэлбит үгүс Майа олохтоохторун кытта кэпсэтэн иһиттэххэ, убаһа этин миэстэнэн эрэ буолбакка, кырбастаан эмиэ атыылаабыттара буоллар, элбэх киһи ылыан баҕарарын этэр, эт да ордубакка атыыга барыа эбит.
Дьон ылбыт эттэрин, астарын салааскаҕа ууран, сорохтор сүгэн-көтөҕөн массыыналарга диэри тиэрдэн биэриигэ волонтердар үлэлээн, аҕам саастаах дьон махталын ыллылар.
Күнүс 12 чаастан сыллата ыытыллар «Көрдөөх стартар» күрэхтэһии буолла. Оонньуу кыайыылаахтарыгар бириистэри улуус дьаһалтата, Майа сэлиэнньэтин дьаһалтата уонна тыа хаһаайыстыбатын управлениета туруордулар.
Онон бүгүн Майа уонна чугастааҕы нэһилиэктэр олохтоохторо эмис идэһэ этин күөстэнэн амсайар киэһэлэрэ буолла. Оттон тыа сирин үлэһит дьоно сыралаах дьарыктарын түмүгэ боруостанар, көлөһүннэрэ тиллэр атыы-дьаарбаҥката тэрээһиннээхтик ааста.
Февронья ОХЛОПКОВА.
