Олунньу 13 күнүгэр Саха Өрөспүүбүлүкэтин гражданскай оборонаҕа, нэһилиэнньэ олоҕор-дьаһаҕар куттал суох буолуутун хааччыйыыга миниистирин солбуйааччы Никита Павлов салайааччылаах бырабыыталыстыба үһүс отчуоттуур бөлөҕө үлэтин 1-кы Тыыллыма нэһилиэгиттэн саҕалаата.
Бөлөх састаабыгар улуус баһылыгын бастакы солбуйааччы Василий Михайлов, управлениелар салайааччылара, эппиэттээх үлэһиттэрэ киирэн үлэлээтилэр.
Никита Александрович толоруулаах былаас ааспыт сыллааҕы үлэтин сүрүн тосхоллорун билиһиннэрэр иһитиннэрии оҥордо. Салгыы олохтоохтор долгутар кыһалҕаларын көхтөөхтүк ыйыталаһан, тустаах салайааччылартан сиһилии хоруйдары, сүбэ-соргу ыллылар. Ыанар ынахха бэриллэр субсидияны туһаныы хайысхаларын, отчуотун, саахалланар туруктаах култуура дьиэлэрин өрөмүөннээһиҥҥэ үбү көрүү, балбаах туһунан итиэннэ сылгыны хаайан аһатыы туһунан сокуоннар, инфляция, уматык сыаната салгыы үрдээбэтигэр туох үлэ барара, сүөһүнү иитэр дьоҥҥо уматык сыанатын толуйуу, суолу оҥоруу, эдэр ыалга, элбэх оҕолоох ыалга дьиэ тутталларыгар көмө, о.д.а. ыйытыктарын туруордулар.
Светлана Захарова сүөһү төбөтүгэр бэриллэр субсидияны тыырыы боломуочуйата улууска бэриллэрэ сөптөөҕүн, чааһынай дьиэлэрэ олус эргэрбит нэһилиэнньэ тииммэт араҥатыгар, кырдьаҕастарга, инбэлииттэргэ олорор усулуобуйаларын тупсарыыга көмө наадатын ыйда. Анал байыаннай дьайыыга быстах хомуурга барбыт саха уолаттарын туһунан санаатын Иван Кривогорницын эттэ. Федор Лукин бааннар миэстэтигэр тахсаннар тыа сирин дьонугар анаан туох-ханнык өҥөнү оҥороллорун билиһиннэриэхтэрин баҕаралларын эттэ.
Лоомтука олохтоохторо сотору кэминэн Өлүөнэ эбэни туоруур муоста тутулларынан, бөһүөлэгинэн кэлии-барыы үксүө диэн суол оҥоһуллуутун туруорсалларын баһылык Руслан Афанасьев иһитиннэрдэ. Маныаха Хара – Лоомтука эрэ буолбакка, Хараттан Моҕотой аартыгынан федеральнай суолга тахсар кэрчиги итиэннэ Лоомтука – Хаатылыма – Хаптаҕай суоллары оҥоруу боппуруостарын үөрэтэн, эрдэттэн үлэни саҕалыахха диэтилэр.
Чыамайыкы сиригэр-уотугар көстүбүт алмаас туһунан ыйытыыга айылҕа баайын чинчийэр тэрилтэлэр өттүлэриттэн эрдэ олохтоох нэһилиэнньэни кытары үлэ барбытын, 2027 сылга диэри чинчиллэрин туһунан СӨ Ил Түмэн Судаарыстыбаннай Мунньаҕын сиргэ сыһыаннаһыыларга, айылҕа баайыгар уонна экологияҕа сис кэмитиэтин бэрэссэдээтэлэ Андрей Находкин иһитиннэрдэ.
Альберт Стручков ыанар ынахха харчы көрүллэр, судаарыстыба өттүттэн сүөһү иитэр дьоҥҥо сөптөөх үлэни ыыталлар, өйөбүл баар диэтэ. Чааһынай сылгылаах дьоҥҥо эмиэ судаарыстыбаттан көмө баара буоллар диэн санаатын Михаил Федоров үллэһиннэ.
Салалтаны кытта таһаарыылаах кэпсэтии буолбутуттан астыммытын, киирбит этиилэр олоххо киириэхтэрэ, сотору нэһилиэккэ күөх төлөн ситимэ кэлиэ диэн эрэнэрин этэн туран, оскуола төрдүттэн өрөмүөннэнэрин туруорсалларын дириэктэр Константин Захаров эттэ.
1-кы Тыыллыма нэһилиэгин олохтоохторо, 68 киһи, бырабыыталыстыба үлэтигэр үчүгэй сыанабылы биэрдилэр.
Февронья ОХЛОПКОВА.
