Бүгүн, тохсунньу 27 күнүгэр, Аҕа дойду Улуу сэриитин кэмигэр блокадаламмыт Ленинград куорат өстөөх төгүрүктээһиниттэн толору босхоломмута 80 сылын бэлиэтиир күн.
Улуус бэтэрээннэрин сэбиэтин бэрэссэдээтэлэ Маргарита Максимова Ленинград блокадатын олохтоохторун үйэтитиигэ бырайыак оҥорон, бүгүҥҥү өйдөбүнньүк күҥҥэ 3-с Мэлдьэхси нэһилиэгэр киинэ сүрэхтэниитигэр барыбытын түмтэ. Бу бырайыак Арассыыйаҕа Дьиэ кэргэн, өрөспүүбүлүкэбитигэр Оҕо саас сылларыгар уонна Ленинград блокадатын 80 сылыгар ананна.
Онон бу күн Томторго Т.А.Свинобоева аатынан култуура киинигэр Афонскайдар бары аймахтарыгар уонна олохтоохторго “Житель блокады Ленинграда, Мать Героиня Афонская Людмила Васильевна” диэн ааттаах киинэ сүрэхтэннэ. Киинэни устан, таҥан оҥорууга Дьокуускайдааҕы сибээс коллеһын преподавателэ Полина Лепчикова уонна бу үөрэх кыһатын бүтэрбит, билигин үлэһит Владимир Осипов үлэлээтилэр.
3-с Мэлдьэхси нэһилиэгин иккис дойду оҥостубут, элбэх көлүөнэни билиигэ-көрүүгэ сирдээбит, үтүөҕэ-кэрэҕэ уһуйбут улуу нуучча кыыһа, Ленинград блокадатын кыттыылааҕа, “Учууталлар учууталлара” бэлиэ хаһаайката, тыыл, үлэ бэтэрээнэ, Мэҥэ Хаҥалас улууһун уонна 3-с Мэлдьэхси нэһилиэгин Бочуоттаах олохтооҕо, Дьоруой Ийэ Людмила Васильевна Афонскаяҕа анаммыт киинэ сүрэхтэниитигэр кыттыыны ыллылар, эҕэрдэ тылларын эттилэр: Саха Өрөспүүбүлүкэтин бэтэрээннэрин сэбиэтин бэрэссэдээтэлэ Вильям Иванов, улуус баһылыгын бастакы солбуйааччы Василий Михайлов, социальнай көмүскэллээх буолуу управлениетын начаалынньыга Иван Шестаков, управление дьиэҕэ социальнай өҥөнү оҥорор салаатын сэбиэдиссэйэ Мария Федорова, улуус бэтэрээннэрин сэбиэтин бэрэссэдээтэлэ Маргарита Максимова уонна сибээс коллеһын преподавателэрэ Полина Лепчикова, киинэни устан, таҥан оҥорбут Владимир Осипов, 3-с Мэлдьэхси нэһилиэгин баһылыга Мирон Свинобоев, социальнай бэлиитикэҕэ управление сүрүннүүр испиисэлииһэ Ньургуйаана Охлопкова уонна Людмила Васильевна кыра уола Аркадий Афонскай.
Афонскайдар аймах бырайыак салайааччытыгар Маргарита Михайловнаҕа итиэннэ бары үлэлэспит дьоҥҥо улахан үлэни оҥорон дьоһун киинэни сүрэхтээбиттэригэр истиҥ махталларын тиэртилэр.
Иван ЛУКИН.
