Кыраайы үөрэтэр түмэл саҥардылынна

Олунньу 27 күнүгэр Роман Гаврильевич Васильев аатынан улуустааҕы кыраайы үөрэтэр түмэл 60 сылын чэрчитинэн, түмэл сүрүн саалата саҥардыллан, үлэҕэ киирэр үөрүүлээх тэрээһинэ буолла.

Мэҥэ Хаҥалас улууһун кыраайы үөрэтэр түмэлэ 1963 сыллаахха сэтинньи ый 2 күнүгэр тэриллибит. 2002 сыллаахха саҥа баараҕай маһынан тутуулаах дьиэҕэ киирбиттэр. 2013 сыллаахха хартыына галереята эбии тутуллан үлэҕэ киирэн, улууспут дьоно ойуулуур-дьүһүннүүр ускуустуба айымньыларын көрөр кыахтаммыттар.

Түмэл 2013 уонна 2016 сылларга Российскай Федерацияҕа «Тыа сиригэр бастыҥ мусуой» үрдүк ааты ылбыта.

Саҥардар үлэ 2023 сылга былааҥҥа киирэн, бэс ыйыттан өрөмүөн саҕаламмыт. Киэҥ хабааннаах үлэ ыытыллан, түмэл саҥалыы тыыннаммыт.

Улууспут устуоруйатын кэрэһэлиир сүрүн сааланы арыйар кыһыл лиэнтэни быһар чиэс Саха Өрөспүүбүлүкэтин култууратын уонна духуобунай сайдыытын миниистиригэр Афанасий Ноевка, Арассыыйа Суруналыыстарын сойууһун чилиэнигэр, Саха сирин научнай киинин бэтэрээнигэр, бэчээт туйгунугар, Роман Гаврильевич төрөппүт кыыһыгар Зинаида Романовна Васильеваҕа, Мэҥэ Хаҥалас улууһун Р.Г.Васильев аатынан кыраайы үөрэтэр түмэл дириэктэригэр Михаил Масахаҕа бэрилиннэ.

Мустубут дьон саҥа саалаҕа киирэн сөҕө-махтайа көрдүлэр. Түмэл билим үлэһитэ Александр Эверстов эспэнээттэри бэрт интэриэһинэйдик сырдатан кэпсээтэ. Салгыы хартыына галереятыгар аастылар, онно икки сааланан Валериан Васильев хартыыналара турбуттар. Галереяны  Михаил Трифонов, түмэл быыстапканы тэрийэр салаа исписэлииһэ, сырдатта.

Бэлиэ тэрээһин үөрүүлээх чааһыгар СӨ култууратын уонна духуобунай сайдыытын миниистирэ Афанасий Ноев эҕэрдэ тылыгар:

— Ханна да сырыттарбын өрүү мэҥэ хаҥаластарынан, эһигинэн киэн тутта, холобур оҥосто кэпсиибин. Сайын Амма улууһугар ыытыллар Олоҥхо ыһыаҕар ааһар ыалдьыттарга, бэйэбит устуоруйабытын, Кулун атах култууратын көрдөрүөҕүҥ, кэпсиэҕиҥ диэн ыҥырда.

Бу күн Р.Г.Васильев аатынан кыраайы үөрэтэр түмэл малын харайар үлэһит Татьяна Егорова Саха Өрөспүүбүлүкэтин култууратын туйгунун аатын ылла.

Муниципальнай оройуон баһылыгын бастакы солбуйааччы Василий Михайлов, култуура уонна духуобунай сайдыы управлениетын салайааччыта Анна Исакова эҕэрдэлэрин тиэртилэр. Майа сэлиэнньэтин баһылыга Алексей Неустроев түмэл кэлэктиибэ дьоҕус эрээри, олус үлэһит кэлэктиип буоларын бэлиэтээтэ. Тастан көмө эрэйбэккэ, бэйэлэрин кыахтарынан сүҥкэн үлэни оҥордулар диэтэ.

Бэлиэ түгэн үөрүүтүн бииргэ үллэстээри Аграфена Макарова аатынан Дьокуускайдааҕы култуура уонна ускуустуба коллеһын дириэктэрэ, Ил Түмэн дьокутаата  Захар Никитин кэлбит. Кини урукку кэмнэргэ үлэлээбит Эдуард Жирков, Нина Никанорова курдук энтузиаст дьонноох буолан, устуоруйабыт күн бүгүҥҥэ дылы тыыннаах диэн аҕынна.

Роман Гаврильевич кыыһа Зинаида Васильева олус долгуйан туран: «Мин аҕам мусуойун дьыалата салҕанан бара турар эбит диэн олус үөрдүм. Өссө сайдыыны баҕарабын!», — диэтэ.

Уон сыл эҥкилэ суох түмэли салайан кэлбит Саха Өрөспүүбүлүкэтин култууратын туйгуна, «Мэҥэ аат» бэлиэ хаһаайына, Майа сэлиэнньэтин Бочуоттаах олохтооҕо Зоя Шарина түмэл бэтэрээн үлэһиттэрин сыанаҕа ыҥыртаан таһаарда. «Мусуой аана хаһан да сабыллыбатын, куруук элбэх көрөөччүлээх буоллун,» – диэн саҥа эдэр салайааччыга Михаил Ивановичка аныгы технологиялары туһанан сайдан иһиҥ диэн алгыс тылларын анаата.

 

Елизавета Неустроева.