Кинилэр Аллараа Бэстээх олохтоохторо. Розалия Тырааныспар техникумун преподавателэ. Күннэй 7-с кылаас үөрэнээччитэ, оҕолорго өрөспүүбүлүкэҕэ ситиһиилээх олоҥхону толорооччу.
Кулун тутар 6 күнүгэр Аан дойду дьахталларын күнүн көрсө «Кэрэ ситим – ийэ кыыһыныын» куонкурус улууска иккис төгүлүн Д.Ф. Ходулов аатынан култуура киинигэр үрдүк таһымнаахтык ааста.
Куонкуруһу «Кыталык» ансаамбыл кырачаан үҥкүүһүттэрэ арыйдылар, ийэ оҕотунуун уобараһын аанньал курдук күндүтүн үҥкүүлээн көрдөрдүлэр. А.С.Пушкин төрөөбүтэ 225 сылын көрсө куонкурус кыттыылаахтарын билиһиннэрии улуу бэйиэт хоһоонунан, кини олорбут кэминэн таҥнан-симэнэн тахсыбыттара олус сонуннук көһүннэ. Дэлэҕэ да биллиилээх бэйиэти Аан дойду литэрэтиирэтин чөмчүүк тааһа диэхтэрэ дуо.
Саалаҕа мустубут кэрэ аҥардары сандал саас маҥнайгы бырааһынньыгынан улуус баһылыгын социальнай боппуруостарга уонна имиджевэй бэлиитикэҕэ солбуйааччы Альбина Григорьева эҕэрдэлээтэ.
«Кэрэ ситим – ийэ кыыһыныын» куонкуруска барыта алта дьиэ кэргэн күн күбэй ийэтэ, кэрэчээн кыргыттара кытыннылар: Тараҕай нэһилиэгиттэн Туйаара уонна Раиса Степановалар, Аллараа Бэстээх бөһүөлэгиттэн Күннэй уонна Розалия Дмитриевалар, Майа сэлиэнньэтиттэн Ариана уонна Алёна Рязанскаялар, Төҥүлү нэһилиэгиттэн Айыына уонна Нюргуяна Борисовалар, Бастакы Наахара нэһилиэгиттэн Александра уонна Нина Титовалар, Бэдьимэ нэһилиэгиттэн Айысхаана уонна Мария Плюктар.
Куонкурус дьүүллүүр сүбэтигэр үлэлээтилэр: «Миссис Мэҥэ Хаҥалас – 2022» улуустааҕы куонкурус кыайыылааҕа, «Ийэ кыыһынаан – 2022» өрөспүүбүлүкэтээҕи куонкурус кыайыылаахтара, «Эн сулускун – 2023» телевизионнай биэрии «Көрөөччү биһирэбилэ» анал аат хаһаайката, элбэх оҕолоох дьиэ кэргэн ийэтэ, Бүтэйдээх нэһилиэгиттэн Ньургуяна Прокопьева, Саха Өрөспүүбүлүкэтин «Россия ийэлэрэ» улуустааҕы түмсүүтүн бэрэссэдээтэлэ, доруобуйа, чөл олох кулуубун салайааччыта Анна Свинобоева, Cаха Өрөспүүбүлүкэтин норуотун маастара, «Уран Майа» түмсүү салайааччыта Надежда Сергеева, «Кэскил» психолого-медико-социальнай арыаллааһын киинин дириэктэрэ, Саха Өрөспүүбүлүкэтин үөрэҕириитин уонна ыччат бэлиитикэтин туйгуна Матрена Птицына, бэрэссэдээтэл – улуус баһылыгын солбуйааччы Альбина Андреевна Григорьева.
Ийэ кыыһыныын куонкурустара биэс түһүмэҕинэн барда: «Ийэм уонна мин» бэйэни билиһиннэрии, «Биһиги дьүөгэлиилэрбит» – ийэҕэ уонна кыыһыгар, бэйэ-бэйэни билиигэ биирдии ыйытык бэрилиннэ. «Кэлбит кэрэхсээтин, көрбүт сөхтүн» – кыыс оҕо уонна ийэ талааннарын көрдөрдүлэр. «Чөл олох, чөл турук» аэробика хамсаныылара, «Кэрэ көстүү» – авангард муодалаах көстүүм дефилета. Иллэҥ кэм дьарыга быыстапкаҕа көрдөрүүгэ турбута.
«Кэрэ ситим” улуустааҕы куонкурус түмүгүнэн дьүүллүүр сүбэ быһаарыытынан «Уран ситимэ” анал ааты Раиса Степанова кыыһыныын Туйааралыын ыллылар (Тараҕай нэһилиэгэ).
«Истиҥ сыһыан ситимэ” анал аат хаһаайыннарынан Нина Титова кыыһыныын Александралыын буоллулар (1 Наахара нэһилиэгэ).
«Талба талаан ситимэ” анал аат ананна Мария Плюкка уонна кыыһыгар Айысхаанаҕа (1 Баатара нэһилиэгэ).
«Кэрэ ситим” күрэс 3-с үрдэлин Алёна Рязанская кыыһыныын Арианалыын ыллылар (Майа сэлиэнньэтэ), 2-с үрдэли – Нюргуяна Борисова кыыһыныын Айыыналыын (Төҥүлү нэһилиэгэ).
«Кэрэ ситим” куонкурус кыайыылааҕынан тахсан, бастыҥ үрдэли Розалия Дмитриева кыыһыныын Күннэйдиин ыллылар (Аллараа Бэстээх бөһүөлэгэ).
Кыайыылаахтарга улуус баһылыга Дмитрий Тихонов туруорбут «Уруу» ювелирнай хампаанньаттан үрүҥ көмүстэн оҥоһуллубут сахалыы сиэдэрэй оҥоһуктар бэлэх быһыытынан туттарылыннылар. Ону таһынан улуустааҕы социальнай бэлиитикэҕэ управление, улуус дьахталларын сэбиэтэ (салайааччы Октябрина Кулешова), «Арассыыйа ийэлэрэ» хамсааһын (бэрэссэдээтэл Анна Свинобоева), Майа сэлиэнньэтин дьахталларын сэбиэтэ (бэрэссэдээтэл Екатерина Романова), улуус эр дьонун түмсүүтэ бириистэри туруордулар.
Куонкуруһу саха эстрадатын ырыаһыта, саха көрдөрөр-иһитиннэр хампаанньа «Саҥа күн» биэриитин ыыттааччыта Аскалон Семенов иилээн-саҕалаан ыытта, ону тэҥэ толорооччулар Зинаида, Владислав Лукачевскайдар, айар куттаах дьиэ кэргэттэр, кэлэктииптэр, эстэпиэтэ лауреаттара эҕэрдэ нүөмэрдэринэн киэргэттилэр.
Куонкуруска кыттыбыт Далбар Хотуттары, кэрэ кыргыттары итиитик-истиҥник эҕэрдэлиибит, көрөөччүлэргэ хатыламмат сэргэх киэһэни бэлэхтээбиккитигэр махтанабыт.
Елизавета Неустроева.
