«Саха» национальнай көрдөрөр-иһитиннэрэр хампаанньа сыл устата бэйэтин биэриилэригэр анал байыаннай дьайыыга көмөлөһөр волонтёрдар үлэлэрин сырдаппыта.
Ол чэрчитинэн «Түмэн» уопсастыбаннай холбоһук анал байыаннай дьайыыга көмөлөспүт волонтёрдара «Саха» НКИХ толоруулаах дириэксийэтин тэрийэр отделын начаалынньыгын солбуйааччы Аэлита Гоголева ыҥырыытынан 2024 сылы көрсөр «Күөх уот» биэриитигэр ыҥырыллан ыалдьыттаатылар.
Кинилэр өрөспүүбүлүкэ олохтоохторун Саҥа үүнэр 2024 сылынан күөх экрааҥҥа эҕэрдэлээбиттэрин ахсынньы 31 күнүгэр долгуйа көрдүбүт. Волонтёрдар араас уотунан-күөһүнэн күлүмүрдүүр ураты кэрэтик киэркэйбит павильоҥҥа 6 чаас устата уһуллубуттар. Манна «Түмэн» уопсастыбаннай холбоһук салайааччыта Мария Лукина, иис сыаҕын салайааччы Федора Наумова, иискэ үлэлэспит Ариадна Филиппова, Полина Осипова, собону хатарыыга көмөлөспүт «Кэнчээри» оҕону сайыннарар киин асчыта Ольга Сергучева, саһыарар сиэккэ баайыытыгар үлэлээбит хамаанда салайааччыта Евдокия Семенова сырыттылар. Волонтёрдар элбэх эстрада сулустарын кытта билсэн-көрсөн, ырыаларын истэн, бииргэ хаартыскаҕа түһэн, умнуллубат түгэни үйэтитэн, үөрэн-астынан кэлбиттэр.
Кинилэри сэргэ, биир дойдулаахтарбыт «Олоҥхо-баттл» кыайыылааҕа Станислав Иванов, Аллараа Бэстээхтэн Нина Семёнова сэбиэдиссэйдээх «Азбука» маҕаһыын кэлэктиибэ ыҥырыллан ыалдьыттаабыттарын киэн тутта сырдаттылар.
Түмэннэр «Саха» көрдөрөр-иһитиннэрэр хампаанньа дириэктэригэр Олег Марковка, тэлэбиидэнньэ эппиэттээх үлэһиттэригэр Аэлита Гоголеваҕа уонна Надежда Капитоноваҕа уопсастыбанньыктарга болҕомтолорун ууран үтүө сынньалаҥы бэлэхтээбиттэригэр, элбэх саҥаны билбиттэригэр-көрбүттэригэр улахан махталларын тиэрдэллэр.
Марелла Баишева.
