Атырдьах ыйын 21 күнүгэр Балыктаах бөһүөлэгэр Кыайыы искибиэригэр Дьокуускайтан Курскай Тоҕойго (Курская Дуга) Кыайыы 80 уонна Саха сиригэр физкултуура хамсааһынын 100 сылларыгар анаммыт сүүрүү кыттыылаахтарын кытта көрсүһүү буолла.
Сүүрүү кыттыылаахтара: Дмитрий Горохов ‒ «Кыайыы уота» хамаанда салайааччыта, Анна Егорова ‒ Дьокуускайдааҕы Социальнай пуонда тутаах отделын салайааччыта, Валентина Доргуева ‒ Оҕо-аймах тэрилтэтин тириэньэр-преподователэ (Таатта), Наталья Неустроева (Дьокуускай), Мария Слепцова ‒ «.Ф.Габышев аатынан ДЮСШ тириэньэрэ (Уус Алдан). КаринаСлепцова ‒ Бороҕон оскуолатын үөрэнээччитэ, Сардана Эверстова ‒ СӨ Национальнай бибилэтиэкэтин үлэһитэ.
Курскай куоракка барыахтаахтара кыаллыбатах. Онон Кыайыы болуоссатыттан өрөспүүбүлүкэтээҕи бэтэрээннэр сэбиэттэрэ, Дьокуускай бэтэрээннэрин сэбиэтэ, мэрияттан бэрэстэбиитэллэр мустан уоту уматан туттарбыттар. Дьокуускайга Сэбиэскэй Сойуус Дьоруойдара Иван Кульбертинов, Владимир Сапожников, Клавдий Краснояров, Сыымахха Федор Попов , Уус Алдаҥҥа Өнөр нэһилиэгэр Арассыыйа Дьоруойа Михаил Стрекаловскай, Танда нэһилиэгэр Владимир Лонгинов сырдык ааттарын чиэстээн Кыайыы уотун тутан сүүрэллэр.
Балыктаахха көрсүһүүгэ Дмитрий Николаевич Курскай Тоҕойго улахан киирсии Аҕа дойду сэриитигэр улахан оруолламмытын туһунан, билиҥҥи эдэр көлүөнэ ону хайаан да билэрэ наадалааҕын бэлиэтээн кэпсээтэ. «Мэҥэ нэһилиэгэ»дьаһалтатын баһылыгын солбуйааччы Иван Мохначевскай Аҕа дойду сэриитигэр кыттыбыт дьоммутун, кинилэргэ анаан тутуллубут Кыайыы искибиэрин туһунан кылгастык кэпсээтэ. Кыайыы уотун дьоруойдар дойдуларынан сылдьан умнуллубат кэриэстэбил ыытыы соругун ситэригэр баҕа санаатын тиэртэ,ситиһиилээх айаны баҕарда. Кыайыы уотун кыттыылаахтара искибиэргэ тыыннаах сибэкки дьөрбөтүн уурдулар.
Мария Захарова
