Успуорт
Тохсунньу 8 күнүгэр Дьаҥхаады нэһилиэгэр Мэҥэ Хаҥаластан дуобакка ССРС успуордун бастакы маастара, улуус Бочуоттаах гражданина Климентий Егорович Попов бирииһигэр 64 харахтаах дуобакка оҕолорго улуустааҕы күрэхтэһии тэрээһиннээхтик ааста.
Күрэхтэһиигэ биһиги улууспутуттан Аллараа Бэстээхтэн, Майаттан, Балыктаахтан, Мэлдьэхситтэн, Төхтүртэн итиэннэ Нам, Кэбээйи улуустарыттан 54 эдэр дуобатчыт саастарынан түөрт бөлөҕүнэн илин-кэлин түһүстүлэр. Түмүккэ кыайыылаахтар сыаналаах бириистэринэн, ону таһынан аҕыс оонньооччу анал бириистэринэн наҕараадаланнылар.
Түмүккэ 2015 с.т. уонна онтон кыра саастаах кыргыттарга Аллараа Бэстээхтэн Каролина Тимофеева бастакы, Мэлдьэхситтэн Амелия Степанова иккис, Сардаана Степанова үһүс, уолаттарга Намтан Дьулус Дьяконов бастакы, Аллараа Бэстээхтэн Володя Филиппов иккис, Мэлдьэхситтэн Эрсан Окороков үһүс миэстэлэннилэр.
2013 ‒ 2014 с.т. кыргыттарга Төхтүртэн Айсара Петрова бастакы, Аллараа Бэстээхтэн Амалия Филиппова иккис, Төхтүртэн Сайнаара Игнатьева үһүс уолаттарга Мэлдьэхситтэн Алгыс Матвеев бастакы, Вова Николаев иккис, Төхтүртэн Арылхан Холмогоров үһүс буоллулар.
2010 ‒ 2012 с.т. кыргыттарга Мэлдьэхситтэн Алина Степанова бастакы, Төхтүртэн Диана Васильева иккис, Мэлдьэхситтэн Саяна Окорокова үһүс, уолаттарга Майаттан Богдан Иванов бастакы, Аллараа Бэстээхтэн Сандал Феофанов иккис, Мэлдьэхситтэн Алеша Третьяков үһүс миэстэлэри үллэһиннилэр.
2006 ‒ 2009 с.т. кыргыттарга Кэбээйиттэн Нарыйаана Николаева бастакы, Төхтүртэн Ира Бурнашева иккис, Балыктаахтан Надя Стручкова үһүс, уолаттарга Мэлдьэхситтэн Прокопий Говоров бастакы, Афанасий Ларионов иккис, Балыктаахтан Женя Куприянов үһүс бириистээх миэстэлэннилэр.
Күрэхтэһии анал бириистэринэн Төхтүр эдэр дуобатчыттара Руслан Романов, Дарина Егорова, Роберт Афанасьев, Арыйаан Готовцев, Леня Татаринов, Коля Петров, Балыктаахтан Коля Шишигин, Аллараа Бэстээхтэн Сайаан Иванов бэлиэтэннилэр.
Тэрээһин биир бэлиэ түгэнинэн Мэлдьэхси орто оскуолатын онус кылааһын үөрэнээччитэ, 100 харахтаах дуобакка Арассыыйаҕа бастыыр иһин күрэхтэһиилэр икки төгүллээх үрүҥ көмүс призера, хамаанданан бастыыр иһин күрэхтэһиигэ бастакы, Арассыыйаҕа хамаанданан бастыыр иһин Куубак чөмпүйэнээтигэр бастакы миэстэлээх Прокопий Говоров 29 дуоскаҕа тэҥинэн сеанс биэрбитэ буолла. Ахсаан 28:1 тэҥнэһэн Прокопий туһатыгар түмүктэннэ.
Күрэхтэһиини тэрийэн ыыппыт Дьаҥхаады нэһилиэгин дьаһалтатыгар, И.М.Романов аатынан Төхтүр орто оскуолатын кэлэктиибигэр, Климентий Попов дьиэ кэргэнигэр истиҥ махталбытын тиэрдэбит.
Ньургуйаана Иванова.
