Олунньу 23 күнүгэр Д.Ф.Ходулов аатынан култуура киинигэр араас сылларга бойобуой дьайыыларга кыттыыны ылбыт биир дойдулаахтарбыт Аҕа дойдуну көмүскээччилэр күннэринэн тэрээһиҥҥэ түмүстүлэр.
Тэрээһин дойдубут, өрөспүүбүлүкэбит Өрөгөй ырыаларын истииттэн саҕаланна, эйэлээх олох иһин олохторун толук уурбут буойуттарбыт үтүө ааттарыгар сүгүрүйэн мүнүүтэ чуумпуран турдубут.
Улуус баһылыга Дмитрий Тихонов бүгүҥҥү бэлиэ күнүнэн эҕэрдэ тылы эттэ уонна Ийэ дойдуларын хорсуннук көмүскээбит дьоммутугар биһиги куруук махталлаахпыт, кинилэр холобурдарынан ыччаттарбытын, уол оҕолорбутун норуоттарын, дойдуларын таптыыр, ытыктыыр, дьиэ кэргэттэригэр бигэ тирэх, өйөбүл буолар дьону иитэн таһаарыахтаахпыт диэн бэлиэтээтэ. Дойдутун туһугар анал байыаннай дьайыы толоонугар олоҕун толук ууран хорсун быһыытын иһин биир дойдулаахпытыгар Дмитрий Михайлович Дьяконовка Арассыыйа Федерациятын «Эр санаа» уордьана иҥэриллибитинэн наҕарааданы уолугар Михаил Дмитриевичкэ, чугас дьонугар туттарда. Хорсун быһыытын иһин дойдутун туһугар олоҕун толук уурбут биир дойдулаахпытыгар Ариан Александрович Колесовка анаммыт Арассыыйа Федерациятын «Эр санаа» уордьанын кэргэнигэр Мария Петровнаҕа, уолугар Миран Ариановичка туттарда.
Сахалыы сиэринэн саалаҕа мустубут дьону ийэлэр, эбэлэр ааттарыттан Майатааҕы Итэҕэл балаҕанын алгысчыта Анна Климентова арчылаата. Дьокутааттар сэбиэттэрин бэрэссэдээтэлэ Иннокентий Андросов, өрөспүүбүлүкэтээҕи байыаннай комиссариат лектора Виссарион Балбахов тыл эттилэр. Аҕа дойдуну көмүскээччилэр күннэринэн эстрада ырыаһыттара кыттыылаах эҕэрдэлэри көрдүбүт.
Мэҥэ Хаҥалас улууһун дьаһалтатын пресс-сулууспата.
