Ырыаҕа ылланар Балыктаах бөһүөлэгэр култуура дьиэтигэр ыраахтан-чугастан мустаннар доруобуйа харыстабылын бэтэрээнэ,Саха Өрөспүүбүлүкэтин доруобуйа харыстабылын туйгуна,Мэҥэ нэһилиэгин бочуоттаах олохтооҕо,күн-күбэй ийэ,эйэҕэс эбээ Любовь Алексеевна Гоголева сырдык кэриэһигэр анаан өр сылларга бииргэ үлэлээбит,алтыспыт чугас дьонноро,оҕолоро хомуйан,бэчээттэтэн таһаартарбыт «Киһи киэнэ үтүөтэ — биэлсэр Люба»диэн кинигэ сүрэхтэниитигэр аналлаах тэрээһин буолан ааста.
Тэрээһини «Мэҥэ нэһилиэгэ» тыа сирин тэриллиитэ баһылык солбуйааччыта Иван Егорович Мохначевскай эҕэрдэ тылынан аста.Биһиги нэһилиэкпитигэр үгүс үтүө үлэһит,киэн туттар дьоннорбутуттан биирдэстэрэ,түөрт уон биир сыл устата доруобуйа харыстабылын эйгэтигэр үтүө суобастаахтык биэлсэринэн үлэлээбит ытык киһибит туһунан кинигэни ырытта Уус Алдан оройуоннааҕы балыыһатын кылаабынай медсестранан үлэлии сылдьар улахан кыыһа Любовь Семеновна Нестерова.
Любовь Алексеевна Никитина 1945 сыллаахха Хаҥалас улууһугар Маҥнайгы Дьөппөн нэһилиэгэр күн сирин көрбүтэ.1967 сыллаахха Дьокуускайдааҕы медучилищены ситиһиилээхтик бүтэрэн Мэҥэ Хаҥалас улууһун Дойдунуускайыгар биэлсэр-акушер пууҥҥа биэлсэринэн ананан үлэтин саҕалаабыта. Онтон 1972 сылтан 2007 сылга диэри Балыктаахтааҕы участковай балыыһаҕа биэлсэринэн үтүө суобастаахтык үлэлээбитэ.1988 сылтан профсоюз бэрэссэдээтэлинэн талыллан кэлэктиибин түмэн сүрдээх эйэлээх кэлэктиип буоланнар таһаарыылаахтык үлэлээбиттэрэ.
2008 сылга бочуоттаах сынньалаҥҥа тахсан баран Балыктаах орто оскуолатыгар медигинэн киирбитэ. Үлэлиир кэмигэр бэйэтин үрдүк профессиональнай специалист быһыытынан көрдөрбүтэ.Отчуоттааһын хаачыстыбата үрдээбитэ,вакцинацияны кэмигэр ыытара,оскуола хас биирдии үөрэнээччитин ис туруктарын олохтоох уонна улуус балыыһаларын таһымыгар чинчийиини сатабыллаахтык тэрийбитэ. Оскуола медкабинетыгар хааччыйар үлэни ыыппыта,наадалаах оборудованиены атыылаһары туруорсубута.
Любовь Алексеевна тус үлэтин таһынан улуус,нэһилиэк общественнай,култуурунай,спортивнай олоҕор актыыбынайдык кыттара. Оҕолоро оскуолаҕа үөрэнэр сылларыгар төрөппүт кэмитиэтин бэрэссэдээтэлинэн талыллан төрөппүттэри кытта үлэҕэ оскуола кэлэктиибин кытта ыкса сибээстээхтик үлэлэспитэ.Нэһилиэккэ бэтэрээн сэбиэтигэр «Айылгы»түмсүү салайааччытынан өр сылларга үлэлээбитэ,»Алгыс» оскуола бэтэрээннэрин ансаамбылыгар ыллыыра,саахымакка оскуола,нэһилиэк чиэһин элбэхтэ көмүскээбитэ. Балыктаах участковай балыыһатын үҥкүү кэлэктиибэ элбэх көрүүлэргэ,куонкурустарга ситиһиилээхтик кыттыбыттара.
Любовь Алексеевна 1973 сыллаахха Гоголев Семен Алексеевичтыын сүрэхтэринэн сөбүлэһэн ыал буолан үс оҕону төрөтөн-иитэн,үөрэттэрэн олохторун оҥкулун оҥорсубуттара.Семен Алексеевич кэргэнигэр күүстээх өйөбүл буолан,дьиэтин-уотун,оҕолорун көрсөн үлэтэ тахсыылаах буоларыгар баһаам көмөлөөх этэ.
Кинигэ презентациятыгар кэлбит бииргэ үлэлээбит,алтыспыт дьоннорун ааттарыттан Лидия Ноговицына,Елизавета Трифонова,Акулина Сотникова,М.П.Габышев аатынан орто оскуолаттан профсоюз бэрэссэдээтэлэ Сардаана Молукова уонна Анастасия Барабанова,кырдьаҕастар сэбиэттэригэр бииргэ үлэлээбит дьүөгэлэрэ Марина Прибылых,Анна Иванова,Наталья Ноговицына истиҥ-иһирэх ахтыылары оҥордулар. Любовь Алексеевна бииргэ төрөөбүттэригэр,чугас аймахтарыгар ураты истиҥ сыһыанын бэлиэтээн кэпсээтилэр Марфа Гоголева Мөҥүрүөн нэһилиэгиттэн,Мария Туласынова,Таатта Чөркөөҕүн олохтооҕо,Екатерина Шарина Майаттан,Петр Никитин-сиэн быраата,дьүөгэтин Екатерина Михайловна кийиитэ Анна Кычкина,аймахтара Татьяна Дьяконова,Роман Гоголев. Оҕолоро-сиэттэрэ ийэлэрин-эбээлэрин туһунан истиҥник ахтан-санаан аастылар.
Бу дьоро күнү салайан иилээн-саҕалаан ыытта Анисия Даниловна Скрябина. Музыкальнай эҕэрдэнэн ситэрэн-киэргэтэн биэрдилэр «Кыталык «үҥкүүнэн «Ыллыкчаан»оҕо образцовай үҥкүү ансаамбыла,»Оҕо сааһым доҕотторо» ырыаны олохтоох балыыһа кэлэктиибэ,доруобуйа харыстабылын бэтэрээннэрэ, «Эйэ-дьол иһин» ырыанан 2-4 кылаас кыргыттара,»Күһүҥҥү ырыа»Вера Фадеева солота,»Дьол ырыата» Рима Фадеева,Дария Андросова дуэттара,»Сайдыына» вокальнай ансаамбыл толоруутугар «Хомус тыаһа» ырыанан.
Тыа сиригэр эмчит үлэтэ сүрдээх уустук,улахан эппиэтинэстээх үлэ.Любовь Алексеевна түүнү-күнүһү,бырааһынньыгы аахсыбакка нэһилиэгин дьонун доруобуйаларын туругун көрүүгэ дириҥ билиилээҕин,кыһамньылааҕын көрдөрөн олохтоохтор дириҥ махталларын ылыан ылбыта,үгүс дьон олохторун быыһаан үйэлэрин уһаппыта. Өр сыллаах сыралаах үлэтэ үрдүктүк сыаналанан Доруобуйа харыстабылын ветерана,Саха Өрөспүүбүлүкэтин Доруобуйа харыстабылын министерствотыттан грамоталарынан бэлиэтэммитэ,Саха Өрөспүүбүлүкэтин Доруобуйа харыстабылын туйгуна бэлиэ хаһаайката,улуустааҕы Доруобуйа кинигэтигэр киирбитэ уонна Мэҥэ нэһилиэгин бочуоттаах гражданина буолбута,норуот убаастаан «Биэлсэр Люба» диэн ааттаабыта элбэҕи этэр. Тэрээһин түмүгэр Любовь Алексеевна оҕолорун ааттарыттан кыыһа Любовь Семеновна биир дойдулаахтарыгар махталын биллэрдэ, үлэһит үтүө дьон ааттара ааттана туруохтун диэн түмүктээтэ.
Мария Захарова. Балыктаах
