Афанасий Илларионов, СӨ физическэй култуураҕа уонна успуорка үтүөлээх үлэһитэ, «Дойдуга үтүөлэрин иһин» уордьан иккис истиэпэннээх мэтээлин кавалера, педагогическай үлэ, успуорт бэтэрээнэ.
РФ Федеральнай Мунньаҕар дойду Бэрэсидьиэнэ Владимир Путин бүгүҥҥү Анал этиитигэр Арассыыйа инники сайдыытыгар кэскиллээх соруктары хабан дириҥ ис хоһоонноох этиини оҥордо.
Үлэлии турар бырайыактар, бырагыраамалар салҕаналларын итиэннэ кэккэ национальнай бырайыактар саҥа киллэриллэллэрин эттэ.
Демографияҕа үлэ күүскэ барыахтааҕын өйдөөтүм.
Ити хайысхаҕа «Дьиэ кэргэн» саҥа национальнай бырайыагынан үлэ ыытыллара ыйылынна.
Уһун үйэлэниигэ уонна олоххо көхтөөх буолууга эмиэ саҥа национальнай бырайыак киирэрин сэргээтим. Чугастааҕы алта сылга доруобуйа харыстабылын эбийиэктэрин тутууга, өрөмүөҥҥэ уонна материальнай-тэхиньиичэскэй хааччыйыыга эбии 1 трлн.солк. көрүллэрин иһитиннэрдэ. Кэлин кэмҥэ доруобуйаларын бөҕөргөтөн успуордунан дьарыктанааччылар ахсааннара хас да төгүл эбиллибитин бэлиэтээтэ итиэннэ диспансеризацияны сыллата ааһар, ГТО нуорматын туттарар дьоҥҥо нолуокка көҕүрэтии (вычет) кэлэр сылтан көрүллүөҕүн эттэ.
«Арыгы иһэргин быраҕан хайыһарга тур» диэн этии билигин тоҕоостоох буолбутун санаппытын сөбүлүү иһиттим.
Успуорт эбийиэктэрин тутууга улахан өйөбүл баар буолсу. Сыллата дойду үрдүнэн 350 успуорт комплексын тутуу былааҥҥа киирбит.
Саҥа национальнай бырайыактарга «Арассыыйа ыччата» бырайыак олохтоноро кэрэхсэбиллээх.
Айымньылаахтык үлэлиир оскуолаларга өйөбүл оҥоһуллуохтааҕа ыйылынна.
Оскуоланы бүтэрээччилэр биир кэлим эксээмэни, өскөтүн туттарбатахтарына, биир предмеккэ иккиһин туттарар кыаҕы үөрэххэ докумуоннары тутуу хампаанньата бүтэ илигинэ биэрэр туһунан эттэ. Оскуолаларга оҕолор үөрэнэр ноҕоруускалара сөптөөх уонна балаансалаах буолуохтааҕын, оскуола бырагырааматыттан эксээмэн ыйытыылара араастаһыа суохтаахтарын, репетиторы төрөппүт барыта уйунар кыаҕа суоҕун сөптөөхтүк ыйда.
Владимир Путин аныгы олох ирдэбилинэн каадырдарга ураты болҕомто ууруллар инниттэн «Каадырдар» диэн национальнай бырайыак олохтонорун иһитиннэрдэ. Оскуола эрдэхтэн оҕону идэҕэ туһаайыыга былааннаах үлэ барыахтааҕар тохтоото, тэрилтэлэр, наука уонна медицина кииннэрин салайааччыларын оскуола үөрэнээччилэрин бэйэлэригэр ыҥыран сырытыннаран үлэлиир эбийиэктэрин көрдөрөллөрүгэр көрдөстө. Оробуочай идэлэргэ саҥа сыһыан олохтонууһу.
Орто анал үөрэх баазатын тупсаран кэскиллээх үлэ барарыгар усулуобуйаны тэрийии соруга туруорулунна.
Анал байыаннай дьайыы кыттыылаахтарыгар үөрэнэллэригэр, идэ ылалларыгар, үөрэхтэрин үрдэтинэллэригэр «Время героев» бырайыак олохтонорун эттэ.
Дойду баһылыгын Анал этиитигэр ылыннарыылаах тылын-өһүн истэн тус бэйэм кини
салгыы үлэлиир кыахтааҕын, баҕалааҕын өссө төгүл итэҕэйдим.