Саха Өрөспүүбүлүкэтин керлинг федерациятын көҕүлээһининэн Мэҥэ Хаҥаласка 2018 с. муус устар 1 күнүгэр бастакытын ыытыллыбыт турнирга Нуораҕана олохтооҕо, успуорду өрө тутар Кузьма Березкин “Муус Таас” хамаанда тэринэн кыттыбыттар. Манна уопсайа 5-6 хамаанда кыттыбытыттан биһиги уолаттарбыт хамаандалара 3-с бочуоттаах миэстэ буолары ситиспит.
Мантан тирэх ылан Кузьма Иннокентьевич бэйэтэ көҕүлээн, керлинг успуордун Дьабыылын нэһилиэгэр сайыннарар сыаллаах 2019 с. тэрийэн ыыппыта. Кинини кэргэнэ Варвара Игоревна өйөөн күүс-көмө буолар. Күрэхтэһии бастакы сылыгар Төҥүлү нэһилиэгиттэн кэлэн кыттыбыттара. 2-с сылыгар 2021 с. Дьокуускай куораттан, Майаттан, Төҥүлүттэн, Балыктаахтан кэлэн киирсибиттэрэ. 2023 сыл кулун тутарга Уһук Илин Красноярскай куоракка ыытыллыбыт “Кубок Енисея” чөмпүйэнээккэ Саха сириттэн үһүө буолан – Майаттан Архип Скрябин, Татьяна Мордовская итиэннэ Нуораҕанаттан Кузьма Березкин биир хамаанданан оонньооннор 2-с миэстэ буолан кэлбиттэрэ.
Керлинг күрэхтэһиитэ быйыл Мэҥэ нэһилиэгэр бастакытын тэриллэн ыытылынна. Манна тэрээһинигэр Нуораҕанаттан Березкиннар көмөлөстүлэр.
Нуораҕанаҕа муус устар 13-14 күннэригэр 3-с төгүлүн 2 күннээх керлинг күрэҕэ буолла. Бастакы күн Н.В.Петров аатынан олохтоох оскуола оҕолоругар ыытылынна. Манна 1-кы миэстэни 1 нүөмэрдээх хамаанда чилиэннэрэ Гриша Свешников, Кеша Алексеев, 2-с миэстэни 4-с нүөмэрдээх хамаанда чилиэннэрэ Кеша Кычкин, Василий Березкин, 3-с миэстэни “Өрүөллэр” хамаанда чилиэннэрэ Ярик Прокопьев, Айтал Тарабукин ыланнар кыайыы өрөгөйүн биллилэр.
1 нүөмэрдээх хамаанда оонньооччута Гриша Свешников “Бастыҥ оонньооччу”, “Чэ-чэ” хамаанда оонньооччулара Алгыс Варламов “Саамай эдэр оонньооччу”, Тимур Петров “Бастыҥ быраҕааччы”анал ааттаннылар.
Маастар кылааска кыттаннар Виолетта Кривошапкина, Мичээрэ Семенова, Зарина Цой, Айыына Брызгалова, Дарина Егорова, Арина Ковлекова, Нарыйа Березкина, Сайдам Березкин сэртипикээтинэн бэлиэтэннилэр.
Керлинг күрэхтэһиитин иккис күнүгэр аһаҕас турнирга Балыктаах ыччаттара кэлэн, барыта 6 хамаанда кытынна.
Манна Костя Ковлеков, Кеша Алексеев кыайыыга дьулуурдарынан 1-кы миэстэ буолан 10000 солкуобай харчынан, дьаныардаахтык киирсэн 2-с миэстэни Балыктаахтан “Ситим” хамаанда ылан Игорь Стручков, Гаврил Дьяконов 7000 солкуобай харчынан уонна 3-с бочуоттаах миэстэ хаһаайыттарынан олохтоох “Дьулуур” хамаанда эстибэт эрчимнээх дьоно Иван Борисов, Василий Березкин 4000 солкуобай харчынан бириистэри туттулар. Үлэ бэтэрээнэ Иннокентий Лонгинов “Саамай аҕа саастаах оонньооччу”, Кеша Алексеев “Бастыҥ оонньооччу” анал ааттары ыллылар.
Нэһилиэккэ успуорт сайдыытыгар ураты сонун Олимпийскай оонньуу көрүҥүн билиһиннэрэн, олус үчүгэй күрэхтэһиини тэрийэн ыытан, нэһилиэнньэни, үүнэр көлүөнэ ыччаты сэргэхситэн, чөл олоххо көҕүлээн, успуорт бу көрүҥэр инникитин эрэли үөскэтэр Березкиннар дьиэ кэргэҥҥэ дьон-сэргэ махтала улахан.
Күрэхтэһии успуонсардарынан тэрийээччилэр Варвара, Кузьма Березкиннар дьиэ кэргэттэрэ, бииргэ төрөөбүт убайдарын дьиэ кэргэттэрэ Матрена, Прокопий Березкиннар, Варвара, Василий Березкиннар, биир дойдулаахтара Валентина, Петр Стручковтар, Мария, Сергей Сергучевтар, Изабелла Попова, Тамара Холмогорова, Антон Егомин, Дьабыыл оскуолатын 1997 с бүтэрбиттэр буоллулар.
Варвара, Кузьма Березкиннар 2014 сыллаахха Сочига ыытыллыбыт кыһыҥҥы Олимпиаданы көрө бара сылдьан керлинг оонньуутун кэрэхсээн кэлбиттэр уонна бэйэлэрин нэһилиэктэригэр баҕа санааларын олоххо киллэрэн тэрийэн ыытан кэллилэр. Хамсык кэмигэр 2 сыл тохтоон баран быйыл салгыы ыыттылар. Өрөспүүбүлүкэтээҕи керлинг федерацията өйөөн снарядтары уларсан кэллэ. Манна киирсэллэр мууһу аалар суокка, гранит таастар, оонньооччу кэтэр слайдердара.
5 миэтэрэ кэтиттээх, 30 м уһуннаах катогу ыччаттар көмөлөрүнэн Кузьма Иннокентьевич хаарын күрдьэн, уу кутан тоҥорон, бэлиэлэри оҥорон бэйэтэ бэлэмнээн кэллэ. Кини кэргэниниин дьону чөл олоххо көҕүлүүр успуорт бу оонньуутун сыллата ыытар былааннаахтар.
Березкиннар 5 оҕолоохтор, Варвара Игоревна технология уонна информатика учуутала идэлээх, билигин кыра оҕотун көрөн олорор. Кузьма тырахтарыыс идэлээх, иллэҥ кэмигэр маһынан уһанар. Эдэр дьон кэтэх хаһаайыстыбаларыгар 12 сүөһүлээхтэр. Олортон 6 ынах төрөөтө, 2 төрүөхтээх, уонна 1 тиҥэһэ, 3 тыһаҕас кыстыгы туораан эрэллэр. 6 куурусса кыһыннары сымыыттыы тураллар. Оттуур сирдээхтэр, от-мас тиийэр дииллэр.
Керлинг күрэхтэһиитин тэрээһинэ ыытыллыытыгар күүс-көмө буолбут Өрөспүүбүлүкэтээҕи керлинг федерациятыгар, олохтоох дьаһалта, култуура киинин үлэһиттэригэр, чугас аймахтарыгар, кыттыыны ылбыт бары спортсменнарга, успуонсардарга Варвара, Кузьма Березкиннар дьиэ кэргэн улахан махталларын тиэрдэллэр.
Марелла Баишева.
