Майаҕа Д.Ф Ходулов аатынан култуура киинигэр олунньу 9 күнүгэр “Көөчөөн көрө доҕоттурунаан” көр-күлүү киэһэтигэр бу жанры өрө тутар көрөөччүлэр кэллилэр. Манна “Сааскы сирэйдэр” өрөспүүбүлүкэтээҕи бэстибээл кыайыылаахтара: Үөһээ Бүлүү Хоротуттан “Хоросуо”, Горнай Мытааҕыттан “Дьиикимдэ дьээбэлэрэ”, Хатастан “Хатас хаадьылара”, Уус Алдан Суоттутуттан “Тэбэнэттэр”, Амматтан Валерий Лобанов, Төхтүртэн Айаан Стручков, Дьокуускайтан Валентина Чиркова уонна Мэҥэ Хаҥаластан “Көөчөөн көрө” мини тыйаатыр артыыстарын курдук дьон-сэргэ кутун туппут көр-күлүү маастардара күлүү дьоро киэһэтин бэлэхтээтилэр.
“Көөчөөн көрө” мини-тыйаатыр салайааччыта, СӨ култууратын үтүөлээх үлэһитэ Анна Охлопкова:
- Күннэтэ кэнсиэр, араас тэрээһин бөҕөтө буолар. Онтон бүгүн биһиги дьоммут талааннарыгар сүгүрүйээччилэр кэлбиккитигэр махтанабын. Мин Аркадий Михайловичтыын 26 сыл бииргэ үлэлээбитим. Убайбыт тэрийбит “Көөчөөн көрө” мини-тыйаатыр 35-с сылбытын үлэлиибит. Сылга иккитэ көрөөччүлэрбитигэр тахсабыт, “Көөчөөн көрө доҕоттурунаан” уонна “Сааскы сирэйдэр” бэстибээлгэ. Убайбыт үлэтин салгыырбытынан киэн туттабыт. 2021 с. “Көөчөөн көрө доҕоттурунаан” бырайыагы төрүттээбиппит. Бүгүҥҥү кэнсиэртэн киирбит үп Аркадий Новиков өйдөбүнньүк бэлиэтигэр угуллуоҕа, улууспут салалтата 3 мөлүйүөн солкуобайы уган тутулла турарынан үөрүүбүт муҥура суох — диэтэ итиэннэ бииргэ айымньылаахтык үлэлиир биир идэлээхтэригэр СӨ култууратын үтүөлээх артыыһа Валентина Чирковаҕа, СӨ култууратын үтүөлээх үлэһитэ Валерий Лобановка, СӨ култууратын туйгуннара Иван Касьяновка, Евдокия Семеноваҕа, Валентина Бубякинаҕа, Төхтүр кулуубун уус-уран салайааччыта Айаан Стручковка, Акулина Митрофановаҕа, Артур Егоровка, Валентина Пестряковаҕа Махтал суруктары туттарда.
Бу кэннэ дьон-сэргэ кутун туппут Валерий Лобанов толоруутугар Христофор Максимов ырыаларын, Аркадий Новиковтыын өр сылларга бииргэ алтыһан үлэлээбит Валентина Чиркова ийэ, дьахтар монологтарын, “Ностальжи”, “Гастрол иннигэр”, “Модернизация”, “Психолог”, “Сталиммын”, о.д.а. сыаҥкалары дуоһуйа көрдүбүт. А.М.Новиков үөрэнээччилэрэ Айаан Стручков, Афанасий Андреев убайдара айан хаалларбыт уобарастарын тута сылдьалларыттан көрөөччүлэр астынан ытыстарын тыаһын харыстаабатылар.
Аркадий Новиков талааныгар сүгүрүйэр, киниэхэ үөрэммит көр-күлүү маастардара кыттыылаах дьоро киэһэттэн сылдьыбыт дьон күлэн-үөрэн, астынан тарҕастылар.
Марелла Баишева.
