Майаҕа Мария Дмитриевна Лукина салайар «Түмэн» уопсастыбаннай түмсүү үлэлээбитэ быйыл 30 сыла буолла. Бу сыллар тухары араас тэрээһиннэргэ барытыгар ситиһиилээхтик кыттан кэллэ. Билигин «Түмэн» түмсүү анал байыаннай дьайыыга сылдьар дьоммутугар 5 хайысханан көмөлөһөр үлэни ыыталлар.
Иис сыаҕа тэриллэн үлэлээбитэ 5 ый буолла. Манна «Эр хоһуун» мөһөөччүккэ киирэр 10-17 араас көрүҥ таҥастары тигэллэр.
Евдокия Семенова уонна Людмила Пивоварова салалталарынан блиндаж чүмэчитин оҥоруутугар үлэлээтилэр. 414 чүмэчини оҥорон «Саха сирэ эйигин кытта» өрөспүүбүлүкэтээҕи ыстаапка туттарбыттара.
Хатарыллыбыт соботтон миин оҥорон ыыппыттара. Бу сонун бүлүүдэни Маргарита Максимова салайыытынан Майа сэлиэнньэтин түөрт уһуйаанын үлэһиттэрэ уонна 1983 сыллаахха оскуоланы бүтэрбиттэр оҥорбуттара. От ыйыгар эмиэ оҥороору былаанныыллар.
Татьяна Попова салалтатынан үрүҥ сиэли, биэс харахтаах тимир харысхалы, тириини, мас хатырыгын туһанан уолаттарбытын араҥаччылыыр харысхаллары оҥорон ыыталлар.
Харысхал сиэккэ – бу билигин олус наадалаах мал. Сиэккэни өрүүгэ күннэтэ «Кыталык» кииҥҥэ Евдокия Семенова уонна Маргарита Максимова салалталарынан Майабыт олохтоохторо үлэлээн күүс-көмө буолаллар, сорох түөлбэлэр бэйэлэригэр баайан бэлэмнээн аҕалаллар.
Иис сыаҕар өрөспүүбүлүкэтээҕи «Илии сылааһа» анал сыахтан сакаас киирэ турар. Иистэнэллэригэр Марелла Баишева бэйэтин дьиэ кэргэнин аатыттан биир иистэнэр массыынаны биэрбит. “Лесной” түөлбэ биир массыынаны, биир оверлогу уларсыбыт. Онтон атынын волонтердар бэйэлэрин иистэнэр массыыҥкаларын аҕалан тутталлар.
«Түмэн» волонтердара Майа дьаһалтата, олохтоохторо буолар аахсыйаларга көхтөөхтүк кытталларын иһин махталларын тиэрдэллэр, өссө да күүс-көмө буолуохтара диэн эрэнэллэрин этэллэр.
Биһиги кэр.