Быыбар ‒ 2024
Кулун тутар 15 ‒ 17 күннэригэр дойду үрдүнэн Арассыыйа Бэрэсидьиэнин быыбара ыытыллыаҕа. Бу эппиэттээх хампаанньаҕа бэлэмнэнэн быыбардааччы киэҥ араҥатын хабан быыбар туһунан сиһилии иһитиннэрэр сыаллаах олунньу 17 ‒ кулун тутар 7 күннэригэр «ИнформУИК» диэн анал бырайыак үлэтин саҕалаата.
Быыбар хамыыһыйатын учаастагын чилиэннэрэ быыбардааччы олорор сиринэн биирдиилээн кыбартыыларынан, дьиэлэринэн сылдьан мобильнай анал сыһыарыыны туһанан быыбар ыытыллар болдьоҕун, бүллүтүөҥҥэ киирбит хандьыдааттар кимнээхтэрин, куоластааһын көрүҥнэрин туһунан сиһилии быһааран биэриэхтэрэ. Маныаха биир да хандьыдаат туһугар аҕатаассыйа ыытыллыбат.
«ИнформУИК» бырайыакка Саха сиригэр баар бары 790 учаастактааҕы быыбардыыр хамыыһыйа кыттан уопсайа 2649 киһи үлэтин саҕалаата. Биһиги улууспутугар 34 учаастактааҕы быыбар хамыыһыйатыттан 111 киһи дьиэлэринэн сылдьаллар.