Бүгүн, балаҕан ыйын 26 күнүгэр, Саха Өрөспүүбүлүкэтин Ил Дархана Айсен Сергеевич Николаев өрөспүүбүлүкэ олохтоохторун кытта «Саха» көрдөрөр-иһитиннэрэр хампаанньа нөҥүө быһа холбонууга дьонун-сэргэтин кытта кэпсэттэ, ыйытыыларга хоруйдаата.
Өрөспүүбүлүкэ инники сайдыыга, Өлүөнэ муостатын тутуу, социальнай боппуруостар, гаастааһын, «Хаарбах дьиэ» бырагырааманан тутуу, суол-иис өрөмүөнэ, уһук оройуоннарга быраастар тиийбэттэрэ, ойуур баһаарын утары охсуһуу, байыаннай дьайыы кыттыылаахтарыгар болҕомто о.д.а. тыын боппуруостар таарылыннылар. Айсен Сергеевич салааларынан үлэни-хамнаһы билиһиннэрдэ, видеоустуулар көрдөрүлүннүлэр.
Ыйытыылары өрөспүүбүлүкэ араас муннуктарыттан быһа эпииргэ холбонон итиэннэ ватсап ситиминэн биэрдилэр. Биһиги улууспутуттан уопсастыбаннай хамсааһын көхтөөх кыттыылааҕа, Майаттан «Лесной» түөлбэ салайааччыта Васианна Иннокентьевна Птицына төлөпүөнүнэн улууска былырыын сайын саахал тахсыбытыттан үс күн электроуота суох олорбуттарын, Майаҕа электроуот барыыта чаастатыйбытын, олохтоохтору эрэйдээбитин, маннык боппуруос хайдах быһаарыллыан сөбүн ыйытта. Онуоха Айсен Сергеевич Майа олохтоохторугар эрэ буолбакка көдьүүстээх боппуруос бэриллибитин бэлиэтээтэ.
‒ Кэнники сылларга, хомойуох иһин, «Якутсэнерго» хайысхатынан саахалтан электроуот арахсыытын кыһалҕата өрөспүүбүлүкэ киин өртүгэр элбээтэ. Ааспыт кыһын федеральнай ситим хампаанньатыгар 220 КВТ үрдүк күүрүүлээх лииньийэҕэ эмиэ саахал тахса сылдьыбыта, бүтүн Илин эҥэргэ уот арахсыбыта. Ити боппуруоһу, биллэн турар, хаалларыахпыт суоҕа, болҕомтоҕо ылыахпыт. Өрөспүүбүлүкэни электроуотунан хааччаҕа суох хааччыйыы туһунан Уһук Илиҥҥи федеральнай уокурукка Юрий Трутнев, Арассыыйа энергетикэҕэ миниистирэ Николай Шульгиновы кыттыылаах элбэх кэпсэтиһиилэр ыытыллыбыттара. Соторутааҕыта Владивостокка ыытыллыбыт саммикка кыттыбытым.
«Якутскэнерго» хампаанньаҕа 2028 сылга диэри саахалы туоратыыга бырагыраама ылылынна. Онуоха көрүллэр үбүнэн-харчынан саахалланар туруктаах лииньийэлэргэ төрдүттэн өрөмүөн ыытыллыахтаах, Сунтаар‒Ньурба, Сулҕаччы‒Амма хайысхаларынан саҥа лииньийэлэр тардыллыахтаахтар. Үбүлээһин «РусГидро» тэрилтэ иһинэн тыырыллыахтаах, эбии үбүлээһини көрдүүллэр. Таривы үрдэтиинэн өрөмүөнү оҥоруохпут диэн боппуруоска сөбүлэспэппит. Ити боппуруоһу «Якутскэнерго» хампаанньа генеральнай дириэктэрэ Гаврил Алексеевы кытта хонтуруоллаһабыт. Өссө төгүл бэлиэтиибин, ити бырагыраама өрөспүүбүлүкэ олохтоохторун олохторун тупсарыыга кыра бөһүөлэгиттэн бөдөҥ куоратыгар тиийэ тыын суолталаах. Электроуот саахалланыыта элбээн иһэринэн хонтуруолга тутабыт. Тыйыс айылҕалаах өрөспүүбүлүкэҕэ кыра да саахал улахан алдьархайга кубулуйуон сөп.
Улахан кыһалҕа федеральнай сетевой хампаанньаҕа баар. «Майа», «Томмот» 220 КВТ үрдүк күүрүүлээх лииньийэ подстанцияларыгар хас да улахан саахал тахсыбыта. Кэтээн көрөр уорганнар, федеральнай ситим исписэлиистэрэ ырытан көрбүттэринэн алдьаныыга тустаах тэрилтэ бырайыакка алҕастар тахсыбыттарын этэллэр. 50 кыраадыстаах тымныыны тулуйар кыахтаах буолуохтааҕын суоттамматахтара көһүннэ. Бырайыагы хос көрөн, тупсаран үлэни ситэрэргэ кэпсэтиһиилэр бардылар. 3 млрд солкуобай суумалаах үлэ быйыл сайын түмүктэннэ. Инникитин улахан саахал тахсыа суохтааҕын мэктиэлииллэр. Майаҕа тахса сылдьан көрбүтүм, ыстаансыйаҕа кэлэр нэдиэлэнэн ситэриэхтээхтэр. Онон мин тус хонтуруолбунан, СӨ Бырабыыталыстыбатын, чуолаан бэрэссэдээтэли бастакы солбуйааччы Дмитрий Садовников быһаччы үлэлэринэн бу хайысхаҕа балаһыанньа тупсарыллыахтаах.
Марфа Птицына.