Филипп Охлопков аатынан Майа орто оскуолатын 9 «б» кылааһын үөрэнээччилэрэ, төрөппүттэрэ сокуоннай саастарын ситэ илик оҕолорго улуустааҕы социальнай-реабилитациялыыр киин стационарнай отделениетын иитиллээччилэригэр саргылаах Саҥа дьыллааҕы бэлэххэ анаан 10000 солкуобай суумалаах сэртипикээти туттардылар.
Бу кылааска билигин 28 оҕо үөрэнэр. 5-с кылаастан саҕалаан кылаас салайааччытынан биология учуутала идэлээх Анна Петровна Васильева үлэлиир. Оҕолор бу 5 сыл устата сокуоннай саастарын ситэ илик оҕолорго социальнай-реабилитациялыыр киини кытта сиэптэһэн кэлбиттэр. 5-с кылааска сылдьаннар төрөппүттэрин кытта сүбэлэһэн баран киин стационарнай отделениетын оҕолоругар бэлэх оҥорбуттар, маастар кылаас ыыппыттар уонна бэйэлэрин күүстэринэн эҕэрдэ кэнсиэр көрдөрбүттэр. Эһиилигэр, 6-с кылааска сылдьан, эмиэ Саҥа дьылга төрөппүттэр күүстэринэн бэлэххэ анаан 3000 солкуобайдаах сэртипикээт туттарбыттар. 7-с кылааска 5000, 8-с кылааска 10000 солкуобайдаах сэртипикээт туттаран оҕолору үөрдүбүттэр. Бүгүн эмиэ үгэскэ кубулуйбут бэлэхтэрин – 10000 солкуобай суумалаах сэртипикээти оҕолорго анаан туттардылар.
— Кылаас салайааччытыгар күүс-көмө буолар төрөппүттэрэ саамай улахан өйөбүлэ буолаллар. Кылааһым төрөппүттэрэ, төһө да элбэх оҕолоох ыаллар буоллар, хаһан да туора турбакка бу көҕүлээһиммитин мэлдьи өйөөн кэллилэр. Онон төрөппүттэрбэр истиҥ махталбын тиэрдэбин, — диир Анна Петровна. – Сэртипикээппитин куруук киэргэтэн оҥорор «Мэҥэ-Шоппинг» маҕаһыын хаһаайкатыгар Татьяна Борисоваҕа махтанабыт.
Хас биирдии оҕо дьиэ кэргэнин кытта үөрэ-көтө сырыттыннар, дьиэлэригэр бары бииргэ буоллуннар. Дьоллоох, дьонноох, доруобай буолуоҕуҥ, эйэлээхтик быр-бааччы олоруоҕуҥ. Кэлэн иһэр Саҥа дьылынан! – диэн Анна Васильева эҕэрдэтин тиэрдэр.
