Иис дьикти абылаҥа

Елена Романова айар үлэтин быыстапката Дьокуускай куоракка тэриллэн ыытылынна. Мэҥэ Хаҥалас улууһун Дьаҥхаадытыттан төрүттээх улууспут маастара, иистэнньэҥ Федора Никитична Попова төрөппүт кыыһа Елена Николаевна Романова “Иис дьикти абылаҥа” быыстапката Дьокуускай куоракка “Симэх” ускуустуба национальнай киинин галереятыгар тохсунньу 6-15 күннэригэр арыллан дьон сэҥээриитин ылла.  

Елена Николаевна Дьокуускай куоракка олорор, үлэлиир уонна иллэҥ кэмигэр саха төрүт ииһигэр сыстан айар үлэ абылаҥар ылларбыта 10 сыл буолбут. Кини СӨ норуотун маастара Людмила Петровна Жиркова “Үктэл” түмсүүтүгэр дьарыктанан, үөрэнэн, саха төрүт ииһигэр уһуйуллан 10 сыл үлэлээбит, айан таһаарбыт үлэлэрин киэҥ эйгэҕэ таһааран айар быытапкатын тэрийдэ. Быыстапкаҕа аттаран-кыбытан, синньэлээн, хоруоҥканан анньан киэргэппит, аппликация ньыматынан тупсарыллыбыт киэргэллэр, суумкалар, көбүөрдэр, паннолар, саха дьахтарын сайынҥы, кыһынҥы төрүт таҥаһа уонна да атын үлэлэр туруоруллубуттар. Сиппит-хоппут, ураты буочардаах иистэнньэҥ таһымнаах үлэлэрин сөҕө көрөҕүн.

Саха дьахтарын толору кыһыҥҥы буктаах сонно, төрүт үгэһи тутуһан, олус кичэллээхтик тигиллибит. Аныгылыы – стилизованнай таҥаһы тупсарар, киэргэтэр, ситэрэн биэрэр киэргэллэри, симэхтэри тупсаҕайдык тигэттээбит. Элбэх сатабылы, ньыманы, ураты сииктэри туһанан сиэдэрэйдик үлэрэрин ситимниир, ситэрэн биэрэр эбит. Бу Елена Николаевна айар үлэтин абылаҥын көрдөрөр быыстапката кэмэ кэлэн, уһун унньуктаах үлэлэри саһыара сыппакка, дьон сэҥээриитигэр таһааран көрдөрөр таһымҥа тахсыбытын бэлиэтэ буолар.

Бу үтүө күнҥэ “Симэх” ускуустуба национальнай киинин салайааччыта Яна Игнатьева Елена Николаевна Романоваҕа “Саха Өрөспүүбүлүкэтин уус-уран оҥоһуктарын маастара” анал бэлиэни туттаран үөрүүбүт үрдээтэ.

Биһиги, биир дойдулаахтара, үөрүүлээх түгэнҥэ кыттыһан эҕэрдэлээтибит. Инники өттүгэр бииргэ үлэлэһэргэ кэпсэттибит, ситими олохтоотубут. Елена Николаевнаны бу үөрүүлээх күнүнэн чугас дьоно, аймахтара, бииргэ үөрэммит үөлээннээхтэрэ эҕэрдэлээтилэр. Уһуйар учуутала Л.П.Жиркова олус истиҥник иилээн-саҕалаан ыытта, сиһилии кэпсээн ситэрэн биэрдэ.

Елена Николаевнаҕа айар үлэтигэр үрдүктэн үрдүк ситиһиини, айар үлэтин аартыга арыллан истин, саҥаттан саҥа үлэлэри айан, тигэн, илиитин араарбакка иистэнэ турдун диэн баҕа санаа бастыҥын аныыбыт.

 

Евдокия Иванова.