Хорообут оскуолатыгар үөрэнээччилэргэ байыаннай дьайыы кыттыылаахтарын туһунан кэпсиибит

Олунньу 15 күнүгэр Дмитрий Таас аатынан Хорообут орто оскуолатыгар Афганистантан Сэбиэскэй Сойуус Сэбилэниилээх күүһүн таһаарыы 35 сыла бэлиэтэнэр күнүгэр бэлиэ күн  ыытылынна. Барыта 66 үөрэнээччи, учууталлар, үлэһиттэр кыттыыны ыллылар.

Аҕа дойду сэриитин кэнниттэн Сэбиэскэй Сойуус, Арассыыйа буойуннара Кореяттан уонна Кытайтан саҕалаан Чечняҕа, Афганистаҥҥа уонна Грузияҕа буолбут 40-тан тахса хаан тохтуулаах кыргыһыыга кыттыбыттара. Хас биирдии сэрии кэннинээҕи көлүөнэ уолаттарын дьылҕатыгар биллибэт кыргыһыы тиксэрэ. Эйэлээх аатырар олоххо саа-саадах тутан, сэрии диэн тугун эттэринэн – хааннарынан билбит, ол гынан баран суостаах-суодаллаах кэмнэргэ эр киһи, саха аатын түһэн биэрбэтэх ытык иэстэрин толору төлөөбүт биир дойдулаахтарбытынан киэн туттабыт.

Хорообут нэһилиэгиттэн Чечняҕа эйэлээх олох иһин туруулаһыыга кыттыбыт биир дойдулаахтарбытынан киэн туттабыт: Федотов Василий Ефремовиһынан, Емельянов Евгений Гаврильевиһынан, бырааттыы Роман Романович, Иннокентий Романович Ивановтарынан, Куличкин Петр Гаврильевиһынан.

 

Время выбрало нас,

Нас позвали в грозный час.

В жаркой афганской метели

Мы особую форму надели.

 

И в огне горных, трудных дорог

Своей грудью кропили походы-

Не заметили в вихре тревог,

Как минуты прессуются в годы.

 

14 тыһ. 454 эдэр олоҕу толук ылбыт Афганистан кырыктаах сэриитэ уһун 10 сыл саҕаламмыта. Бу сэриигэ барыта 546.200 киһи кыттыбыта, 50.056 буойун эчэйбитэ.

Эйэлээх олох иһин туруулаһыыга Афганистан сэриитигэр кыттыбыт биир дойдулаахтарбытынан, оскуолабыт выпускниктарынан Валерий Валерьевич, Егор Яковлевич Шариннарынан киэн туттабыт.

Күн-бүгүн байыаннай дьайыыга биһиги оскуолабытыгар үөрэммит 15 выпускникпыт, үөрэнээччилэрбит убайдара, аҕалара, аймахтара дойдубут туһугар эр санааларын ылынан, ытык иэстэрин толоро сылдьаллар. Хас биирдии үөрэнээччибиһиги эйэлээх олохпут иһин туруулаһа сылдьалларын өйдүөхтээх. Кыра да көмөбүт ол сиргэ олус наадатын!

Оскуола кэлэктиибэ араас тэрээһиннэри, аахсыйалары ыытан көмөлөстүбүт. «Харысхал»  нобуорун, «Эр бэрдэ, этэҥҥэ эргиллээр!» диэн суруйан, харысхал, суруктар, барыта 50 устуука нобуору ыыппыппыт. Ыраах сиргэ тиийэн буойуннарбыт тутан үөрүүлэрин үллэстэллэр, махтаналлар. Бу кинилэргэ ымыы, харысхал буоларын, дойдуларыгар ахтылҕан күүһүрэрин суруйаллар.

Үлэһиттэр, учууталлар сылаас кээнчэ, бэргэһэ тигэн ыыппыттара. Саа уоһугар чехолу 10 кылаас кыргыттара, үлэһиттэр тиктилэр. «Сылаас суорҕан» аахсыйаҕа кыттан, түөлбэлэринэн харчы хомуллубута. Блиндаж чүмэчитин салгыы оҥоробут, үлэһиттэр 55 устууканы, итини таһынан кылаастарынан бэлэмнииллэр. Бу күннэргэ туттарыахпыт.

Хас биирдии үөрэнээччи “Буойуҥҥа сурук” аахсыйаҕа кыттан истиҥ тыллаах, кыраһыабай буочарынан суруйан, уруһуйдаан сурук суруйаллар. Кэлэр нэдиэлэҕэ кылаастарынан хомуйан туттарыахтара.

Октябрина Васильева.

Байыаннай дьайыы кыттыылаахтара