Тохсунньу 2-8 күннэригэр Д.Таас аатынан Хорообут орто оскуолатыгар национальнай многоборьеҕа оҕолорго дьарык ыытылынна.
Улуус оскуолаларыттан 15 оҕо интэринээккэ олорон итиэннэ 6-7 олохтоох оҕолор дьиэлэриттэн сылдьан успуорт бу көрүҥэр үрдүк категориялаах тириэньэргэ Темир Сыдыкбековка дьарыктаннылар.
Темир Абдыкалыевич санаатын бу курдук үллэһиннэ:
— Оҕолор дьарыгы, олорор усулуобуйаны, асчыттар минньигэс, тотоойу астарын астыннылар. Киэһээ аайы оскуола саалатыгар оҕо, ыччат мустан волейбол, тиэнньис оонньууллара олус үчүгэй.
Кини дьарыкка сылдьыбыт оҕолор, төрөппүттэр уонна тус бэйэтин аатыттан оскуола салалтатыгар улахан махталын тиэртэ.
«Дьэ, бу курдук тириэньэр Темир Сыдыкбеков оҕолор хотугу многоборьеҕа дьарыктанан эт-хаан өттүнэн сайдалларыгар, өрөбүллэрин туһалаахтык атааралларыгар, анал былаан, эрэсиим оҥостон, дьаныардаахтык үлэлээтэ. Василий Прибылых, Андрей Винокуров тириэньэри кытта тэҥҥэ үлэлэстилэр», — диэн Д.Таас аатынан Хорообут орто оскуолатын дириэктэрин иитэр үлэҕэ солбуйааччы Октябрина Васильева иһитиннэрдэ, оскуола салалтатын аатыттан махтанна уонна инникитин даҕаны оҕолору сайыннарыга ситимнээхтик үлэлииргэ эрэллээҕин эттэ.
