Улуус баһылыгын отчуота
Тохсунньу 23 күнүгэр улуус баһылыгын ааспыт сыллааҕы үлэтин отчуоттуур бөлөҕө күн бастакы аҥаарыгар Холгума нэһилиэгэр үлэлээтэ.
Бөлөх үлэтигэр СӨ Судаарыстыбаннай Мунньаҕын (Ил Түмэнин) 26 N-дээх Мэҥэ Хаҥаластааҕы быыбардыыр уокуругун дьокутааттара Андрей Находкин, Захар Никитин кытыннылар.
Отчуоту улуус баһылыга Дмитрий Тихонов туруорда.
Олохтоохтор, буоларын курдук, нэһилиэккэ тыын суолталаах боппуруостары ‒ саҥа хочуолунай, култуура киинин тутуллуутун, Наахараҕа быраас амбулаториятын үлэтэ сөргүтүллэрин, уот ситимигэр икки трансформатордарын бииргэ холбооһуну, бөһүөлэккэ биэлсэр, аптека көрүллэрин туруорустулар. Итини сэргэ Чыамайыкыга алмаас хостооһунун туһунан социальнай ситимнэринэн тарҕаммыт сураҕы чуолкайдастылар.
Бу ыйытыыга Ил Түмэн дьокутаата, Сир сыһыаннаһыыларыгар, айылҕа баайыгар, экологияҕа сис кэмитиэт бэрэссэдээтэлэ Андрей Находкин толору хоруйу биэрдэ. Кини Чыамайыкыга алмаас көстүбүтэ биллибитэ уонтан тахса сыл буолбутун, ити боппуруоһунан нэһилиэккэ уопсастыбаннай истиилэр ыытыллан геологическай чинчийиилэргэ сөбүлэҥ бэриллибитин, 9 трубкаттан 4-гэр алмаас баар буолуон сөптөөҕүн туһунан биллибитин кэпсээтэ. Ол эрэн алмаас хостооһуна чугастааҕы сылларга саҕаланарын туһунан кэпсэтии билигин турбатын, чинчийии үлэлэрэ өссө да 2027 сылга диэри баран нэһилиэнньэни мунаахсытар, долгутар боппуруос барыта өртүттэн, ол иһигэр айылҕа харыстабыла үөрэтиллиэхтээҕин быһаарда.
Майатааҕы РЭС начаалынньыга Станислав Оконешников уот ситимигэр быйыл сайын хапытаалынай өрөмүөн былааҥҥа киирбитин эттэ.
Нэһилиэк Бочуоттаах гражданина, үлэ бэтэрээнэ Михаил Гаврильев бэйэтин этиитигэр улуус салалтатын үлэтин үчүгэйинэн сыаналаата, үгүс үлэ-хамнас барарын сэргиирин бэлиэтээн туран, инникитин омук кэскилин туһугар салалта өртүттэн дьиэ кэргэҥҥэ улахан болҕомто уурулларыгар, чуолаан ыччаттарбыт төрөппүттэригэр ытыктабыллаах сыһыаннарыттан саҕалаан дьиэ кэргэн бигэ туруктаах буоларын ситиһэргэ киэҥ өрүттээх үлэ-хамнас тэриллэригэр баҕа санаатын тиэртэ.
Отчуот мунньаҕар Бырамаҕа 36 киһи кытынна.
Алена ДОКТОРОВА.
