Бүгүҥҥү күҥҥэ улуус баһылыга Дмитрий Тихонов ааспыт сыллааҕы үлэтин отчуоттуур мунньаҕа Ходоро нэһилиэгинэн түмүктэннэ.
Ходоролор, хочолор курдук, отчуокка эмиэ бэрт көхтөөхтүк кэлэн кытыннылар. Отчуот сүнньүнэн уонна нэһилиэк уонна улуус инники сайдыытыгар үгүс ыйытыылары биэрдилэр, санааларын үллэһиннилэр, этиилэрин киллэрдилэр.
Тыа хаһаайыстыбатынан дьарыктанар улуус буоларбытынан, салалтаны кытары көрсүһүүлэргэ бу салаа кыһалҕалара нэһилиэк ахсын таарыллаллар. Олохтоохтору сүөһү иитиитинэн дьарыктанар улууспут биир бөдөҥ тэрилтэтэ ‒ «Чүүйэ» МУТ үлэтэ-хамнаһа сиэрдээхтик долгутар. Хаһаайыстыба сүөһүлэрин кыстыгы этэҥҥэ туоратарга күүһүн, кыаҕын ууран үлэлэһэр. Биллэн турар, үлэһит илии тиийбэтэ үлэни атахтыыр. Улуус салалтата хаһаайыстыба үлэтин болҕомто киинигэр тутан кыалларынан күүс-көмө, өйөбүл буоларын көрөбүт, билэбит. Онон тэрилтэ өссө бигэтик атаҕар турарыгар эрэнэбит.
Доруобуйа харыстабылыгар каадырынан хааччыллыы, култуура киинин өрөмүөнэ, Өлүөнэни туоруурга суудунаны атыылаһыы, Чүүйэ ‒ Майа суолугар сырдатыы, тротуары ууруу, бөһүөлэк иһинэн иһинэн федеральнай трасса ааһарынан суолга «сытар полицейскайдары» оҥоруу о.д.а боппуруостара көтөҕүлүннүлэр. Нэһилиэккэ уу таһар массыынанан хааччыллыыны, оскуолаҕа хапытаалынай өрөмүөнү о.д.а кэккэ кыһалҕаларын туруорустулар.
Семен Дмитриев олус дириҥ ис хоһоонноох, дьон санаатын хабар отчуот оҥоһуллубутун, улуус салалтата каадыр резервэтигэр былааннаахтык үлэлэһэригэр, Геннадий Скрябин улуусптугар тыа хаһаайыстыбатын бородууксуйатын оҥорон таһаарыыга күүскэ ылсан үлэлэһэргэ, Алексей Васильев улууспутугар үс сыл устата Тыа хаһаайыстыбата сыла биллэриллибитин биһириирин, Чүүйэ оскуолатын агро хайысхалыырга этиилэрин киллэрдилэр.
Отчуоттуур бөлөх үлэтигэр кыттыбыт Ил Түмэн дьокутааттара Андрей Находкин, Захар Никитин, оройуон Сэбиэтин бэрэссэдээтэлэ Иннокентий Андросов бэйэлэрин этиилэригэр олохтоохтору оройуон сайдыытыгар биир сүбэнэн түмсэн үлэлэһэргэ ыҥырдылар.
Алена Докторова.
‒