Олунньу 14 күнүгэр Саха Өрөспүүбүлүкэтин бырабыыталыстыбатын 2023 сыллаах үлэтин отчуота Хара нэһилиэгэр буолла. Бастакы бөлөҕү өрөспүүбүлүкэ экэниэмикэтин миниистирэ, улуус кураатара Петр Попов салайан илдьэ сылдьар.
Улуус баһылыгын социальнай уонна имиджевай бэлиитикэҕэ солбуйааччы Альбина Григорьева, управлениелар салайааччылара арыаллыы сылдьаллар. Альбина Андреевна отчуот бөлөҕүн билиһиннэрдэ, мунньаҕы салайда.
Миниистир Петр Иванович ааспыт сылга ыытыллыбыт үлэни хайысхаларынан сиһилии сырдатар дакылаатын кэннэ олохтоохтор мунаарар боппуруостарын үлэ бэтэрээннэрэ туруордулар.
Николай Дмитриев отчуоту үчүгэйинэн сыаналаата, гаастааһын киирбитигэр махтанна итиэннэ сир баайын хостооһунугар тус санаатын эттэ, скважина уутун ыраастаан таһаарарга анал тэрил наадатын, дойдуга электроуот тарыыбын сыаната биир буолара уонна түһүөн наадатын тиэртэ.
Любовь Дмитриева дьон олоҕун-дьаһаҕын тупсарыыга үлэ барарын этэн туран чааһынай дьиэлээх дьоҥҥо туох көмө баарын, доруобуйаларыгар хааччахтаах дьон дьиэтин хапытаалынай өрөмүөнүгэр көмө наадатын тиэрдэн туран тэтимнээхтик быһаарылларыгар баҕарда.
Федот Харитонов ыччаты тыа хаһаайыстыбатыгар сыһыарар наадаттан, тыа сиригэр сүөһү-ас эстибэтин туһугар аныгы ирдэбилгэ эппиэттиир саҥа хотон тутуллуон, ыччакка сүөһү анаан, анал бырагыраама оҥорон инвестиция угарга, тыа хаһаайыстыбатын үлэтин чэпчэтэр сыалтан саҥаны киллэрэн иһэргэ, үлэни-хамнаһы киэҥник сырдатарга, ыччаты көҕүлээн элбэх куонкурустары тэрийэргэ этиилэри киллэрдэ.
Успуорт бэтэрээнэ Афанасий Илларионов 2023 сыл ахсынньы 12 күнүгэр любительскай, маассабай, корпоративнай успуорт туһунан сокуон ылылынна, Владимир Путин илии баттаата, онон сибээстээн тыа сиригэр маассабай успуорду көҕүлээн “Урожай” уопсастыбаны сөргүтүөххэ наадатын эттэ итиэннэ 1969 сыллаахха Мэҥэ Хаҥалас оройуонугар “Манчаары” бирииһигэр 2-с ыспартакыйаада ыытыллыбыта 2029 сылга 60 сылын туоларынан “Манчаары” оонньууларын Мэҥэ Хаҥаласка ыытарга үлэлэһэ сылдьалларын сырдатта.
Суругунан элбэх ыйытык киирбит. Ньиэби оҥорон таһаарар собуот тутулуннаҕына бензин сыаната чэпчиэ дуо диэн ыйытыыга миниистир ахсааммыт аҕыйаҕынан собуоту тутар ороскуоттаах буолуоҕун, гаас оттукка көһөр ордугун, онно көмө харчы көрүллэрин сүбэлээтэ. Өрөспүүбүлүкэҕэ ханнык оҥорон таһаарар тэрилтэлэр баалларын, Чыамайыкыга көстүбүт кимберлит туруубка туһунан, суол быраабылаларын бэлиэлэрэ хаһан уларыйалларын, диализ киинэ Майаҕа аһыллыа дуо, Майаттан Хаптаҕайга быһа барар суол наадатын, хоту оройуоннарга көтөр “Полярные авиалинии” сөмөлүөттэрэ саҥардыллыахтара дуо, Өлүөнэ муостатыгар пуойас туоруур суола баар буолар дуо, инбэлииттэргэ дьиэ тутуллуо дуо, саҥа кулууп тутуллуутугар, типовой бырайыактар нэһилиэнньэлээх пууннарга тутуллаллара буолуо дуо, биэнсийэҕэ сыһыаннаах о.д.а. ыйытыктарга туһааннаах салайааччылар толору хоруйдаатылар.
Баһылык Дария Ивановна бэйдиэ сылдьар ыттарга, куоскаларга тыа сирин түөлбэлэригэр анал сокуон суоҕунан федеральнай сокуоҥҥа сааһылааһын наадатын, нэһилиэнньэ кыаммат араҥатыгар материальнай көмөҕө типовой бырагыраама наадатын, “Үтүө дьыала” чэрчитинэн тутуллубут эбийиэктэр өрөмүөннэригэр анал бырагыраама наадатын, аныгылыы кэпэрэтиип хотоно тутуллуон наадатын, социальнай эбийиэктэр тутуллалларыгар көмө наадатын, о.д.а. барыта 8 пууннаах туруорсар этиилэрин миниистиргэ туттарда.
Миниистир Петр Попов үлэ дьонун бэлиэтээн Үөрэҕирии министиэристибэтин Бочуоттаах грамотатын «Кэрэчээн” уһуйаан успуорт инструкторыгар Иван Макаровка ытыс тыаһын ортотугар туттарда.
Отчуоту 60 киһи иһиттэ.
Марелла БАИШЕВА.
