Сэтинньи 15 күнүгэр И.Г.Игнатьев аатынан Харатааҕы успуорт орто оскуолатыгар Саха Өрөспүүбүлүкэтин үтүөлээх учууталын Илья Назаров үлэтин сырдатар хаартысканан быыстапка Саха сиригэр физкултуура хамсааһынын 100 итиэннэ Педагог уонна настаабынньык сылыгар ананан ыытылынна.
Тэрээһиҥҥэ кыттыыны ылбыт Хара нэһилиэгин олохтооҕо, кыраайы үөрэтээччи Федот Харитонов, успуорт бэтэрээнэ Афанасий Илларионов, улуустааҕы физическэй култуура уонна успуорт управлениетын начаалынньыга Алексей Попов бэйэлэрин ахтыыларыгар Илья Романович Хараҕа өр сыл физкултуура учууталынан айымньылаахтык үлэлээбит сылларыгар оҕо доруобуйатын тупсарыыга тус методикатын итиэннэ тэрийэн үлэлэппит үлэ-сынньалаҥ лааҕырын уопутун туһунан ол сылларга уһуллубут хаартыскаларынан көрдөрөн кэпсээтилэр.
Быыстапкаҕа биллиилээх фотограф Василий Сидоров түһэрбит өрөспүүбүлүкэ үтүөлээх учууталын, Үөрэҕирии эйгэтин Бочуоттаах үлэһитин, СӨ үөрэҕириитин туйгунун, СӨ үөрэҕин ситимин Бочуоттаах бэтэрээнин, оҕо кутун туппут дьиҥнээх учуутал Илья Назаров үлэтин сырдатар хаартыскалара учуутал тус архыыбыттан туһанылыннылар.
Түмүккэ Федот Харитоновка И.Г.Игнатьев аатынан Харатааҕы успуорт орто оскуолатын үөрэнээччилэрин уонна үлэһиттэрин кэлэктиибин аатыттан нэһилиэккэ физкултуурунай хамсааһын уонна успуорт сайдыытыгар, үүнэр ыччат чөл олоххо, эт-хаан өттүнэн сайдыылаах буоларга тардыһарыгар кылаатын иһин махтал суругу туттардылар.
