Ахсынньы 27 күнүгэр И.Г.Игнатьев аатынан Харатааҕы успуорт орто оскуолатыгар нэһилиэккэ оскуола тэриллибитэ 60 сылын бэлиэтиир үөрүүлээх бырааһынньык буолан ааста.
Быйыл күһүн үөрэх дьыла саҕаланыаҕыттан бу кэрэ-бэлиэ күнү көрсө педагогическай үлэ бэтэрээннэрин, нэһилиэк чулуу спортсменнарын, биллиилээх дьонун кытта көрсүһүүлэр, успуорт араас көрүҥнэригэр күрэхтэһиилэр, үөрэнээччилэргэ айар үлэ, уруһуй куонкурустара, оскуола устуоруйатын чинчийэр-сырдатар үлэ, оскуола иһин-таһын тупсарар уонна да атын тэрээһиннэр ыытылыннылар.
Дьоро күн оскуолаҕа сарсыардаттан ыраахтан-чугастан ыҥырыллан кэлбит ыалдьыттар, кэнчээри ыччат туһугар кэккэ сылларга үлэлээн ааспыт учууталлар, оҕо аймаҕы эт-хаан өттүнэн сайыннарбыт, кыайыыга кынаттаабыт тириэньэрдэр, араас кэмнэргэ оскуоланы бүтэрбит выпускниктар, нэһилиэк олохтоохторо муһуннулар. Үөрүүлээх быһыыга-майгыга “Выпускниктар галереяларын” байытыы, саҥа тренажернай сааланы арыйыы сиэрэ-туома ыытылынна.
Бырааһынньык үөрүүлээх чааһыгар муниципальнай оройуон баһылыга, оскуола выпускнига Дмитрий Тихонов, Саха Өрөспүүбүлүкэтин Ил Түмэн Судаарыстыбаннай Мунньаҕын дьокутаата Тихон Скрябин, С.Н.Донской 2-с аатынан Үөрэҕирии сайдыытын уонна эбии үөрэхтээһин институтун уопсастыбаннаһы кытта үлэҕэ отделын салайааччыта Дария Санникова, филология кафедратын сэбиэдиссэйэ Любовь Андросова, Хара нэһилиэгин баһылыга Дария Назарова, улуус үөрэҕин управлениетын начаалынньыга Гаврил Толстяков, физическэй култуураҕа уонна успуорка управлениетын начаалынньыга Алексей Попов, култуураҕа уонна духуобунай сайдыыга управлениетын начаалынньыгын солбуйааччы Александр Кулешов, улуус үөрэҕин үлэһиттэрин идэлээх сойуустарын кэмитиэтин бэрэссэдээтэлэ Иннокентий Скрябин, оскуола мэссэнээтэ, РФ физическэй култуураҕа уонна успуорка туйгуна Александр Попов эҕэрдэлээтилэр уонна улуус үөрэҕин сайдыытыгар кылааттарын, өр сыллаах үтүө суобастаах үлэлэрин иһин оскуола учууталарыгар уонна техүлэһиттэригэр, интэринээт иитээччилэригэр наҕараада, сыаналаах бэлэх туттардылар.
Хара спортивнай орто оскуолатын дириэктэрэ Алексей Стручков «Оскуола сайдыытыгар кылаатын иһин» диэн бэлиэни, ону кытта үөрэнээччилэр уонна учууталлар бэйэлэрэ оҥорбут бэлэхтэрин өр сылларга эҥкилэ суох үлэлээбит бэтэрээн учууталларга, тэҥҥэ үлэлии сылдьар кэллиэгэлэригэр, оскуола материальнай туругун сайыннарыыга көмөлөспүт дьонугар утары уунна.
Салгыы хаартыскаҕа түһүү, оскуола устун экскурсия тэрилиннэ, минньигэс астаах, сылаас чэйдээх эбиэт остуола тардылынна. Үөрэнээччилэр Саҥа дьыллааҕы кэнсиэрдэрэ, выпускниктар параттара, уруккуну-кэлиҥҥини ахтыһыылара, оскуолаларыгар бэлэх-туһах туттарыылара, эҕэрдэлэрэ олус долгутуулаах, истиҥ быһыыга-майгыга буолан ааста.
Былырыыҥҥы үөрэх дьылыттан былааннанан, тэрээһин үлэтэ эрдэ саҕаланан ыытыллыбыт оскуолабыт бырааһынньыга ситиһиилээхтик ааспытын элбэх ыалдьыт бэлиэтээтэ. Бу үлэҕэ оскуола үөрэнээччилэрин уонна учууталарын кэлэктииптэрэ, төрөппуттэр ис сүрэхтэриттэн баҕаран актыыбынайдык, өрө көтөҕүллэн туран кытыннылар, кыһалыннылар.
Маннык тэрээһиннэр оҕону кыра сааһыттан үөрэммит оскуолаларыгар, нэһилиэктэригэр, төрөөбүт дойдуларыгар таптал, бэриниилээх буолуу тыыныгар иитэр-үөрэтэр соруктаахтар.
Ити курдук, оскуола 60 сыллаах үбүлүөйүн күн араас хабааннаах тэрээһиннэр буолан аастылар, ыалдьыттар оҕолор бары көхтөөх кыттыыны ыллылар. Үөрэх туйгуннара, бастыҥ спортсменнар Сана Дьылынан анал бириистэри туттулар. Араас сылларга бутэрбит выпускниктарбыт, үлэлээн ааспыт бэтэрээннэр ыалдьыттаан, үөрэн-көтөн тарҕастылар.
