Хаптаҕай нэһилиэгэр бырабыыталыстыба ааспыт сыллаах үлэтин отчуотун Саха Өрөспүүбүлүкэтин гражданскай оборона дьыалаларыгар уонна нэһилиэнньэҕэ куттал суох буолуутун хааччыйыыга миниистирин солбуйааччы Никита Павлов салайааччылаах үһүс бөлөх туруорда.
Успуорт комплексыгар буолбут отчуоттуур мунньахха Хаптаҕай нэһилиэгин олохтоохторо 74 киһи мустан, сүрүн дакылаат кэнниттэн үлэни-хамнаһы дьүүллэһиигэ көхтөөхтүк кытыннылар. Кинилэр сотору кэминэн манна баараҕай тутуу – Өлүөнэ өрүһү туоруур муоста тутулларынан нэһилиэк кэҥиир, улаатар кэскиллээх буолуоҕун, ол эрээри социальнай эбийиэктэр тутууларын туруорсубуттара өр сыл буолбутун туһунан сытыытык эттилэр.
Баай устуоруйалаах, улууска, өрөспүүбүлүкэҕэ инники күөҥҥэ, 10 бастыҥ агро-хайысхалаах оскуола иһигэр киирсэр Хаптаҕай орто оскуолата 1974 сыллаахха үлэҕэ киирбит дьиэҕэ үлэлиирин дириэктэр Ирина Кычкина иһитиннэрдэ.
Оттон Анастасия Кривошапкина нэһилиэк иккис сүрүн кыһалҕатын – култуура дьиэтэ суоҕун, 1959-1961 сс.тутуллубут кулууп саахалланар туруктаах буолан сабыллыбыта ырааппытын, бу успуорт саалатыгар дьукаахтаһан тэрээһиннэри ыытар табыгаһа суоҕун бэлиэтээн эттэ. Муоста тутуутун чааһыгар нэһилиэнньэҕэ быһаарар, чинчийиилэрин билиһиннэрэр үлэни ыыталларын ирдиибит диэтэ.
Муоста тутуута хайдах былааннаахтык барарын, билигин туох үлэлэр ыытыллалларын «Өлүөнэ муостата» ГКУ генеральнай дириэктэрэ Артем Артемьев иһитиннэрдэ. Кини билигин, эбэ икки биэрэгэр тутуу былаһааккаларын бэлэмнээһиҥҥэ кыттыыны ылар тэрилтэлэргэ олохтоох дьон кэпсэтэн үлэлии киириэн сөп диэтэ. Муоста тутулуннаҕына өрөспүүбүлүкэ бас билиитигэр киирэр, «ВИС» бөлөх үлэлэтэр, көрөр-истэр тэрилтэ буолар диэтэ. Билиҥҥитэ чэпчэки массыыналарга босхо, ыарахан уйуктаах таһаҕас таһар массыыналарга 2,5 тыһыынчаҕа диэри төлөбүрдээх буолара былааннанарын иһитиннэрдэ.
Валентина Соломонова өрүһү туоратар салгын олбохтоох ааллар сыаналара бас-баттах барыытын тохтотор дьаһаллары ылыы, Светлана Кокорева эбийиэктэр тутуллар болдьохторо кэннин диэки сыҕарыйара өйдөммөтүн, Алевтина Егорова элбэх дьон үлэлээн хамнастанан олорбут комбикорм оҥорор собуот туһунан санааларын эттилэр. Николай Попов Уһук Илин гектар иитинэн бэриллибит сирдэр туһунан итиэннэ Хаптаҕай нэһилиэгин социальнай-экэнэмиичэскэй сайдыытын стратегиятын оҥордум, ону экэниэмикэ министиэристибэтигэр тиэрдэргитигэр көрдөһөбүн диэтэ.
Өр сыл нэһилиэк баһылыгынан үлэлээбит Екатерина Гаврильева бу туруорсууларынан элбэхтик үлэлээбиттэрин этэн туран, үлэ түмүктээх буоларын туһугар салалта өттүттэн чопчу эппиэттээх дьону аныыр наадатын ыйда. Зоя Илларионова оҕо уһуйаанын төрдүттэн өрөмүөннээһин бырагырааматыгар киирсэргэ үлэлииллэрин иһитиннэрдэ.
Сытыы туруорсуулаах мунньах түмүгэр бырабыыталыстыба бөлөҕүн салайааччы Никита Павлов, Ил Түмэн дьокутаата Андрей Находкин, улуус баһылыгын бастакы солбуйааччы Василий Михайлов, нэһилиэк баһылыга Иван Зыков, уокуруктан оройуон сэбиэтин дьокутаата Михаил Масаха Хаптаҕай нэһилиэгин сайдыытыгар, олохтоохтор туруорсууларынан үлэни бары бииргэ ыытыахпытын наада диэн санааҕа кэллилэр.
Муостаны тутар тэрилтэ олохтоохтору кытта балаҕан ыйыгар мунньах тэрийэн бырайыагын, үлэни-хамнаһы билиһиннэриэхтээх диэн буолла. Оттон Хаптаҕай нэһилиэгин сайдыытыгар туспа, анаан-минээн мунньах тэрийэр соругу туруордулар.
Февронья ОХЛОПКОВА.
