Хаптаҕай нэһилиэгин дьаһалтата олохтоох көҕүлээһини өйүүр бырагыраама чэрчитинэн көрүллүбүт үбүнэн-харчынан элбэх хайысхалаах успуорт былаһааккатын туттарда.
Алтынньы 29 күнүгэр бэлиэ тэрээһини ыытан оҕолорго сүҥкэн үөрүүнү бэлэхтээтэ. Дьаһалта баһылыга Иван Зыков: “Оҕо-уруу ыра санаа оҥостубут кыһынын хоккей оонньуурга аналлаах куорт, сайынын волейбол, футбол былаһаакката буолар кыахтаах элбэх хайысхалаах успуорт былаһааккатын олохтоох көҕүлээһини өйүүр бырагырааманан тутулунна. Бэдэрээтчит Николай Павлов хаачыстыбалаахтык тутан үлэҕэ киллэрдэ”.
Аныгылыы тупсаҕай тутуулаах былаһаакканы арыйыыга нэһилиэк дьоно бүттүүн оҕолорун кытта кэлэн көхтөөхтүк кытыннылар. Былаһаакка тулата бүтүннүү лаампа уотунан дьэрэкээнник күлүмүрдүү сырдаабыт. Хаҥкы кэппит оҕолор хатыыскалаан, араастаан эргичийии, сүүрүү-көтүү буолбуттар. Кыһыҥҥы кэмҥэ хоккейнай куорт арыһыллыытыгар мустубут төрөппүттэргэ, оҕолорго дьаһалта баһылыга Иван Зыков, оскуола үөрэнээччилэрин бэрэсидьиэнэ Калерия Готовцева, физкултуура учуутала Прокопий Зыков эҕэрдэ тылы эттилэр.
Хаптаҕайга өрүү да успуорт сайдыытыгар болҕомтону күүскэ уураллара. Араас көрүҥнэргэ успуорт маастарын нуорматын толорбут спортсменнар ааттара Хаптаҕай оҕолорун кыайыыга-ситиһиигэ сирдиир сулус буолаллар.
Зинаида Игнатьева.
