Олунньу 17 күнүгэр улуустааҕы «Кэрэли» эбии үөрэхтээһин киинин иһинэн үлэлиир «Мусуой дьыалата» куруһуок оҕолоро (салайааччы Любовь Гаврильева) Саха сиригэр Пионерия тэриллибитэ 100 сылынан уонна В.П.Ларионовка аналлаах дэкээдэ түмүктэнэринэн, I Тыыллыма нэһилиэгэр Владимир Петрович улааппыт, билигин сахаттан бастакы академик мусуой-дьиэтигэр сылдьан, барытын илэ харахпытынан көрөн, олус сэргээн кэллибит.
Владимир Петрович туттубут малларын, үлэлэрин, кырдьык, бэйэбит тутан-хабан көрөн, «хаһан эрэ кини манан хаама сырыттаҕа» диэн санааттан олус долгуйдубут, итэҕэйдибит. Дьиэтэ турар уулуссатыгар кини аатын иҥэрбиттэр эбит. В.П.Ларионов оскуолаҕа биир да «түөрдү» ылбакка барыта «биэс» сыанаҕа үөрэнэн, оскуолатын кыһыл көмүс мэтээлинэн түмүктээбит. «Биир дойдулаахпыт академик буолан дойдутун ааттата сылдьарынан киэн туттуҥ, үөрэтиҥ», – диэн Надежда Диктовна Ларионова бэрт тиийимтиэтик кэпсээтэ. В.П.Ларионов төрөөбүт күнэ оруобуна улууспут төрүттэммит күнүгэр сөп түбэһэринэн, улууспут бэлиэ күнүн тэрээһиннэрэ бу дьиэттэн саҕаланан бараллар эбит.
Ол кэннэ С.З.Борисов аатын сүгэр Тыыллыма орто оскуолатыгар биһигини дириэктэр сүбэһитэ Анастасия Дмитриева медиа куруһуок оҕолорун кытары көрүстэ. Биир саастыылаахтарбытын кытары билистибит, кинилэр эмиэ 7-с кылаастар эбит, оскуолаларын көрдүбүт уонна түмэлгэ сырыттыбыт.
Оскуолалара интэринээттээх эбит, онно автомат таҥас сууйардаахтар, биһиги онно ымсыырдыбыт. Оскуолалара аактабай саалалаах, икки спортивнай, хореографическай саалалардаах. Сып-сырдык, сып-сылаас, киһи эрэ туйгуннук үөрэниэн сөпусулуобуйа тэриллибит. Оҕо ахсаана аҕыйах, интэринээттэригэр 16 эрэ оҕо олорор дииллэр. Оскуолаларыгар уопсайа 2 түмэл баар эбит, онтон биирин көрдөрдүлэр. В.П.Ларионов олоҕун, үлэтин кэпсиир итиэннэ Пионерия муннугун көрөн, С.З.Борисов туһунан истэн сэҥээрэн кэллибит.
Семен Захарович Борисов бырамыысаланнас сайдыытыгар (таас чох, кѳмүс, алмаас, гаас Дьокуускайга кэлиитэ), Бүлүүтээҕи ГЭС, Якутскэнерго, авиация, Амакинскай геология-чинчийэр эспэдииссийэ үлэтэ, Саха судаарыстыбаннай университетын аhыллыыта, Дьокуускай куоракка таас дьиэлэри тутуу, тупсаран оҥоруу киириитэ, тимир суол тутуутун туруорсуу курдук, о.д.а. хайысхаҕа элбэх үлэни ыыппыт эбит. Дьокуускай к. 203 микрооройуонугар, В.П.Ларионов уонна Суорун Омоллоон уулуссаларын быhа охсуhууларыгар кѳстүүлээх сиргэ С.З.Борисов пааматынньыгын туруорбуттар, бу оскуолалара кини аатын сүгэр эбит.
Биһиги олунньу 17 күнүн – Саха сиригэр Пионерия тэриллибитэ 100 сыла туолар күнүн өйбүтүгэр-санаабытыгар дириҥник хатаатыбыт, бу күн ылбыт билиибитин инники буолар практическай конференцияларга туһаныахпыт диэн бигэ эрэллээхпит.
Сылаас, ыраас микроавтобуспут суоппарыгар Андрей Альбертовичка, кини үлэлиир тэрилтэтигэр махталбытын тиэрдэбит.
Валерия Тарасова,
«Кэрэли» эбии үөрэхтээһин киинин «Мусуой дьыалата» куруһуогун иитиллээччитэ, И.Г.Тимофеев аатынан Майатааҕы лиссиэй 7-с кылааһын үөрэнээччитэ.
