Тохсунньу 22 күнүгэр улуус баһылыга Дмитрий Тихонов ааспыт сыллааҕы үлэтин 2-с Тыыллыма нэһилиэгэр Хаатылымаҕа отчуоттаата.
Ил Түмэн дьокутаата Олег Марков, оройуон Сэбиэтин бэрэссэдээтэлэ Иннокентий Андросов уонна улуус управлениеларын, тэрилтэлэрин салайааччылара кыттыыны ыллылар. Мунньаҕы нэһилиэк баһылыга Айсен Спиридонов иилээн-саҕалаан ыытта.
Дмитрий Иванович ааспыт сылга барбыт үлэлэри уонна байыаннай дьайыыга улуустан күүс-көмө бара турарын кэпсээтэ. Нэһилиэктэн 16 олохтооҕо отчуоту болҕойон иһиттилэр уонна бэйэлэрин ыйытыыларын биэрдилэр. Сүрүннээн тэрилтэлэргэ эдэр үлэһиттэр суохтарын, кинилэр олорор дьиэлэрэ суоҕун бэлиэтээтилэр. Нэһилиэккэ киирэр суол тупсарылларын, саҥа култуура киинэ тутуллара, тыа хаһаайыстыбатын өртүгэр үүккэ арыы сыаҕа наадатын туруорустулар. Балбаах харайар сокуона олоххо хайдах киирэн иһэрин, саха ынаҕын иитии туһунан сурастылар, иһэр уу турбата уларыйара наадатын туһунан санааларын эттилэр.
Иван Лукин.
