Олунньу 13 күнүгэр, Ийэ тыл уонна сурук-бичик күнүгэр, Майатааҕы «Кэнчээри» уһуйаан бары бөлөхтөрүн икки ардыларыгар дойдуга Дьиэ кэргэн, Саха сиригэр Оҕо саас сылларын бэлиэтээн, «Сахам тыла барахсан» уус-уран ааҕыы күөн күрэһэ уһуйаан иһинэн үлэлиир «КУБИК» телестудия салайыытынан бэрт тэрээһиннээхтик ыытылынна.
Күрэскэ кыра бөлөхтөртөн саҕалаан барыта 23 биирдиилээн уонна 7 бөлөҕүнэн ааҕыы сыаналанна. Дьүүллүүр сүбэҕэ уһуйааммыт бэтэрээн иитээччитэ Устиния Долгунова, логопед учуутал Сардана Алексеева, улуустааҕы М.И.Брызгалова аатынан оҕо бибилэтиэкэтин сүрүннүүр бибилэтиэкэрэ Юнона Игнатьева үлэлээтилэр.
Кыра бөлөхтөргө Нарыйаана Иванова, Аина Иванова, Дамир Сергучев, орто бөлөхтөргө Чаҕыл Самсонов, Артём Скрябин, Санаайа Новгородова, улахан бөлөхтөргө Алгыстаан Ильин, Дайаана Олесова, Лилия Федорова, бэлэмнэнии бөлөхтөргө Валерия Степанова, Сандаара Долгунова, Аделия Ушницкая бастыҥнарынан ааттаннылар. «Кылаан Чыпчаал» муҥутуур кыайыылааҕынан Айаал Шестаков буолла.
Бөлөҕүнэн ааҕыыга: кыраларга — «Чооруостар», ортолорго — «Тииҥчээн», улахаттарга — «Току-току-ньээм-ньээм», бэлэмнэнии бөлөхтөргө — «Сир симэхтэрэ» кыайдылар.
Кыттааччылар сахалыы таҥнан-симэнэн, төрөөбүт тыл, дьиэ кэргэн, оҕо саас туһунан хоһооннору аахтылар.
Күрэс муҥутуур кыайыылааҕар «Кылаан чыпчаал» анал аат, миэстэлэспит оҕолорго — 1,2,3 таһымнаах «Добун суруктар», «Чээн» күпүүрэлэр, бэлэх кинигэлэр туттарылыннылар.
Бу курдук оҕолорбутун кыра саастарыттан илгэлээх ийэ тылбыт, төлкөлөөх төрүт тылбыт, сардаҥалаах саҥарар саҥабыт эйгэтигэр иитиэҕиҥ, сайыннарыаҕыҥ!
«Кэнчээри» уһуйаан «КУБИК» телестудията.