Саҥа 2024 сылга үктэнээт, тохсунньу 4 күнүгэр Алтан нэһилиэгэр Тымныы оҕонньор бирииһигэр 6-с төгүлүн бильярд күрэхтэһиитигэр табаарыстыы көрсүһүү буолла. Чөл олоҕу тарҕатааччы, успуорт инстуктора Гаврил Попов көҕүлээһининэн ыытыллыбыт тэрээһиҥҥэ ыаллыы сытар Алтан уонна Моорук нэһилиэктэрин баһылыктара Николай Матчитов уонна Аисен Игнатьев Саҥа сылынан күрэхтэһээччилэри эҕэрдэлээтилэр.
Бильярд успуордун таптааччылар икки ардыларыгар 18-45 саастаахтарга диэри 8 киһи кытынна. Манна бастакы миэстэни Георгий Лобанов (Моорук), иккиһи Афанасий Романов (Өлөчөй), үсүһү Сайаан Лобанов (Моорук) ыллылар. Орто саастаахтарга 3 киһи кыттыбыттарыттан бастакы Михаил Тихонов (Өлөчөй), иккис Василий Романов (Моорук), үһүс Петр Федоров (Моорук) буоллулар. Аҕам саастаахтарга 9 киһи кыттан эрбии биитинии кииристилэр. Кытаанах киирсии түмүгэр бастакы миэстэни Андрей Слепцов (Өлөчөй) ылла, иккиһи Петр Зыков (Моорук), үсүһү Роман Егоров (Моорук) ыллылар. Кыайыылаахтар бары мэтээлинэн, грамотанан, анал бирииһинэн наҕараадаланнылар.
Кылаан кыайыылааҕынан Өлөчөйтөн Дмитрий Белолюбскай тахсан үөрүүтэ үрдээтэ. Кини 3000 солк., Моорук нэһилиэгиттэн 2-с миэстэлээх Георгий Лобанов 1500 солк. харчыны ыллылар.
Кыайыылаахтар өттүк харалаах үөрэн-көтөн бардылар. Моорук эдэр ыччата олохтоох ыччаты кытта күөн көрсөн бэйэ-бэйэлэриттэн уопут ылан элбэххэ үөрэннилэр, илин-кэлин былдьаһан көрдөрүүлэрин тупсардылар.
Успуорду таптааччылар күрэхтэһииттэн астыннылар. Ыччаты эт-хаан өттүнэн сайдалларыгар, чөл олоххо көҕүлээн спортивнай оонньуулары кэмиттэн кэмигэр тэрийэн ыытар инструктор Гаврил Элестофоровичка бар дьоно махтаналлар.
Марелла Баишева.
