Алтынньы 10 күнүгэр Томтор бөһүөлэгэр П.А.Ойуунускай аатынан Саха академическай тыйаатырын уонна саха киинэтин артыыһа, 3-с Мэлдьэхси нэһилиэгин Томтор сэлиэнньэтиттэн төрүттээх биир дойдулаахпыт Туйаара Анатольевна Свинобоева аатын үйэтитэн оҕолорго, ыччаттарга аналлаах бастакы улуустааҕы уус-уран ааҕыы, биирдиилээн үҥкүү күөн күрэһэ тэриллэн ыытылынна.
Туйаара Анатольевна баара буоллар балаҕан ыйын 25 күнүгэр 50 сааһын туолуохтаах этэ… Хомойуох иһин, баара буоллар диирбитигэр тиийэбит… Эдэр, кэскиллээх, талааннаах, саҥа тахсан иһэр ыччаппыт, талан ылбыт сөбүлүүр идэтигэр Саха тыйаатырыгар ситиһиилээхтик үлэлээн испитэ. Алексей Балабанов «Река» киинэтигэр ыҥырыллан уһулла сылдьан олус хомолтолоохтук олохтон туораабыта.
Биир дойдулаахпыт, талааннаах эдэр, инники кэскиллээх ыччаппыт аатын үйэтитэн нэһилиэкпит култууратын киинигэр 2016 с. кини аата иҥэриллибитэ, бырааттыы Пономаревтар аатынан оскуолаҕа үҥкүү ансаамбыла тэриллибитэ.
Сырдык аатын үйэтитэн култуурабыт киинигэр 50 сыллаах үбүлүөйүгэр анаан кини олоҕун кэпсиир истиэндэни кини бииргэ төрөөбүттэрэ, уһуйааччыта Ефим Николаевич Степановтыын сүбэлэһэн оҥорон бэлэхтээтилэр. Бу тэрээһиҥҥэ Туйаара Анатольевна олоҕун салҕааччылара кыыһа, сиэнэ, бииргэ төрөөбүттэрэ, оскуолаҕа, училищеҕа, театральнай устуудьуйаҕа бииргэ үөрэммит оҕолоро, табаарыстара, Саха тыйаатырын артыыстара, улууспутуттан “Кыталык” үҥкүү норуодунай ансаамбылын уһуйааччылара кыттыыны ыллылар.
Куонкуруска Аллараа Бэстээхтэн, Хараттан, Төхтүртэн, Томтортон 20 оҕо уонна ыччат кытынна. Салайааччылар күүскэ бэлэмнээн оҕолору, ыччаттары аҕалбыттара киһини үөрдэр.
Дьүүллүүр сүбэҕэ П.А.Ойуунускай аатынан Саха академическай тыйаатырын уонна киинэтин артыыһа, туруорааччы режиссер, РСФСР үтүөлээх, СӨ норуодунай артыыһа, ССРС Судаарыстыбаннай бириэмийэтин лауреата, артыыһа, Туйаара үөрэппит учуутала Ефим Николаевич Степанов, СӨ үтүөлээх артыыһа, П.А.Ойуунускай аатынан СӨ бириэмийэтин лауреата, Саха театральнай диэйэтэллэрин сойууһун бэрэссэдээтэлэ Айаал Аммосов, СӨ үтүөлээх артыыһа Ирина Никифорова, СӨ үтүөлээх артыыһа, Арассыыйа, СӨ култуураҕа уонна ускуустубаҕа судаарыстыбаннай бириэмийэтин лауреата Иннокентий Луковцев, тыйаатыр уонна киинэ артыыһа, СӨ үтүөлээх артыыһа Петр Садовников, тыйаатыр уонна киинэ артыыһа, СӨ култууратын туйгуна .Сергей Баланов, “Кыталык” ансаамбыл уус-уран салайааччыта, СӨ култууратын туйгуна Александра Петровна Соловьева, хореограф, СӨ култууратын туйгуна Майя Дмитриевна Ноева үлэлээтилэр.
Сахабыт сирин аан дойдуга аатырда сылдьар тыйаатырын артыыстарын, улууспутун аатырдыбыт “Кыталык” ансаамбыл уһуйааччыларын иннигэр куонкурус кыттыылаахтарыгар, салайааччыларыгар холонон көрөр долгутуулаах, эппиэтинэстээх, ол эрэн үөрүүлээх түгэн тосхойдо. Улуустааҕы тэрээһиммит бастакы холонуу буолан кыттааччылар, салайааччылар, көрөөччүлэр, бары даҕаны түмүгү күүттүбүт.
Куонкурус түмүгүнэн уус-уран ааҕыыга Гран-при аатын Алико Митрофанова (Төхтүртэн) ылан Туйаара Свинобоева бииргэ төрөөбүттэриттэн смарт тэлэбиисэринэн, Айталина Павлова бастакы үрдэл ‒ Туйаара однокурсниктара олохтообут харчынан бирииһинэн, иккис үрдэл Элла Свинобоева (Томтор) Томторго бииргэ үөрэммиттэриттэн ДНС-ка 10 000 тыһыынчалаах, Сандаара Чикальдина (Төхтүр) улуустааҕы култуура управлениетын 10 тыһ. сэртипикээтинэн, үһүс үрдэл Луиза Свинобоева (Томтор) Төхтүргэ бииргэ үөрэммит оҕолоруттан 10 000 тыһыынчалаах харчынан, Алгыс Попов (Төхтүр) Томтор кыттыгастаах кыра тэрилтэлэр 8000 харчынан бириистэринэн, Сандаара Сергучева (Төхтүр) “Томтор” ХЭТ кэлэктиибин 5000 харчынан, Коля Яковлев Төхтүргэ бииргэ үөрэммит оҕолорун ааттарыттан 5000 харчынан, Сергей Неустроев (Төхтүр) Томтор орто оскуолата олохтообут 5000 суумалаах сэртипикээтинэн, Артур Макаров (Томтор) “Мичээрэ” оҕо саадын кэлэктиибиттэн 5000 харчынан бэлиэтэннилэр.
Үҥкүүгэ Гран-при Мария Филиппова (Хара) буолары ситистэ. Бииргэ төрөөбүттэриттэн смарт тэлэбиисэринэн, Ульяна Васильева Төхтүргэ бииргэ үөрэммит одноклассниктар ааттарыттан 10000, Вениамин Иванов (Томтор) олохтоох дьаһалта олохтообут 5000, Максим Слепцов (Томтор) олохтоох “Күндү күлүүктэр” көр-күлүү бөлөҕүн 3 000 харчынан бириистэринэн наҕараадаланнылар.
Тэрээһин П.А.Ойуунускай аатынан Саха академическай тыйаатырын “Лоокуут уонна Ньургуһун” испэктээгинэн түмүктэннэ.
Инникитин маннык тэрээһини олоҕор бэрт кылгастык, ол эрээри чаҕылхайдык күлүмнээн ааспыт биир дойдулаахпыт, эдэркээн сулуспут Туйаара Свинобоева аатын үйэтитэн үбүлүөйдээх сылларыгар ыытарга былааннанныбыт. Маннык тэрээһинтэн кыым саҕан нэһилиэкпит, улууспут аатын ааттатар чаҕылхай талаан тахсыаҕар эрэнэбит. Түгэнинэн туһанан тэрээһиммит тэриллиитигэр көмөлөспүт, успуонсардаабыт тэрилтэлэрбитигэр, Саха тыйаатырын артыыстарыгар, Туйаара бииргэ төрөөбүттэригэр, олохтоох дьаһалтаҕа, култуура тэрилтэтин үлэһиттэригэр олохтоохтор ааттарыттан барҕа махталбытын биллэрэбит.
Парасковья Местникова, бибилэтиэкэр.
