Павловскайга педагогическай үлэ, успуорт бэтэрээнэ, Догдоҥо нэһилиэгин Бочуоттаах гражданина Константин Гаврильевич Гермогенов кэриэһигэр дуобакка уонна саахымакка күрэхтэһиилэр бастакытын ыытылыннылар.
Күрэхтэһии аһыллыытыгар Нөөрүктээйи нэһилиэгин баһылыга Николай Федоров, олохтоох оскуола дириэктэрэ Валерий Петров, улуустааҕы саахымат федерациятыттан Павел Цыпандин, успуорт бэтэрээнэ, норуоттар икки ардыларынааҕы категориялаах судьуйа Дмитрий Сыромятников-Кэрэһиннээх, олоҕун аргыһа Аксинья Гермогенова, кыыһа Софья Яковлева истиҥ-иһирэх тылынан ахтан-санаан аастылар, олоҕун, үлэтин сырдаттылар.
Күрэхтэһиигэ Хаҥаластан, Мэҥэ Хаҥалас нэһилиэктэриттэн уопсайа 54 дуобатчыт уонна саахыматчыт кыттыыны ыллылар.
Саахымат күрэхтэһиитигэр эр дьоҥҥо бастакы миэстэҕэ Гаврил Колосов (Майа), иккискэ Андрей Брызгалов (Павловскай), үһүскэ Альберт Степанов (Мэлдьэхси), бэтэрээннэргэ бастакыга Павел Цыпандин (Майа), иккискэ Николай Климентов (Майа), үһүскэ Валерий Говоров (Хаҥалас, Күөрдэм) таҕыстылар. Дьахталларга бастакы миэстэни Ольга Иванова (Мэлдьэхси), иккис Анна Давыдова (Аллараа Бэстээх), үһүс Матрена Шарина (Төхтүр) ыллылар.
Дуобакка эр дьоҥҥо бастакы миэстэни Иван Семенов (Мэлдьэхси), иккиһи Павел Скрябин (Майа), үсүһү Афанасий Павлов (Аллараа Бэстээх), бэтэрээннэргэ бастакыны Савва Аргунов (Хара), иккиһи Иван Тарабукин (Төҥүлү), үсүһү Николай Романов (Төхтүр) ыллылар. Дьахталларга Анна Чупрова (Аллараа Бэстээх) бастаата, иккис Туйаара Егорова (Павловскай), үһүс Ньургуйаана Иванова (Аллараа Бэстээх) буоллулар, бэтэрээн дьахталларга Мария Третьякова (Төхтүр) бастаата.
Элбэх кыттааччы тэрийээччилэр ааттарыттан анал бириистэргэ тиксэн, үчүгэй тэрээһиннээх күрэхтэһииттэн астынан, тэрийээччилэргэ, Константин Гаврильевич дьиэ кэргэнигэр махтанан тарҕастылар.
