Бүгүн, от ыйын 21 күнүгэр, Майаҕа Д.Ф.Ходулов аатынан норуот айымньытын киинигэр Аммаҕа ыытыллыбыт успуорт адаптивнай көрүҥнэригэр өрөспүүбүлүкэтээҕи XIV «Дьулуур» ыспартакыйаадаҕа ситиһиилээхтик кыттыбыт улууспут хамаандатын чиэстээһин ыытылынна.
Успуорт алта көрүҥнэригэр ыытыллыбыт күрэхтэһиигэ улууспут спортсменнара 16, ол иһигэр 8 кыһыл көмүс, 4 үрүҥ көмүс, 4 боруонса мэтээли ылан бастакы бөлөххө, Дьокуускай куорат кэннэ, бочуоттаах иккис миэстэни ылары ситистилэр.
Улуус баһылыга Дмитрий Тихонов чөмпүйүөннэргэ 50, үрүҥ көмүс призердарга 30, боруонса призердарга 10 тыһыынча солкуобайдаах харчынан бириэмийэлэр сэртипикээттэрин туттарда. Спортсменнары бэлэмнээбит тириэньэрдэр эмиэ бириэмийэлэннилэр.
Спортсменнары чиэстээһиҥҥэ быйылгы тэрээһин уратытынан биир да спортсмен туора тутуллубатаҕын астына бэлиэтиибит. Хамаанда састаабыгар кыттыбыт хас биирдии спортсмен 10 тыһыынча солкуобайдаах сэртипикээти тутта. Онон 48 спортсмен бары илии тутуурдаах, өттүк харалаах хааллылар. Бу ‒ сиэрдээх уонна сөптөөх быһаарыы. Итини сэргэ кэккэ спорсменнар, тириэньэрдэр улуус баһылыгын Махтал суругунан бэлиэтэннилэр.
‒ Бүгүн биһиги спортсменнарбыт ыспартакыйаадаҕа үрдүк ситиһиилээхтик кыттыбыттарынан кинилэргэ истиҥник махтанан туран, улууспут хас биирдии олохтооҕун кытта муҥура суох үөрүүбүтүн үллэстэбит, ‒ диэн тэрээһин кэннэ тута санаатын үллэһиннэ улуус баһылыга Дмитрий Тихонов. ‒ Үс сылынан Бүлүүгэ ыытыллар тэрээһиҥҥэ хамаандабыт иннигэр кыайыы туһугар ох курдук оҥостон өссө күүскэ бэлэмнэнэр сорук турар. Онуоха бары күүс-көмө, өйөбүл буоларбыт ирдэниллэр.
Успуорт уонна физическэй култуура улуустааҕы управлениетын начаалынньыга Алексей Попов ситиһиилээхтик кыттыбыт спортсменнарга, тириэньэрдэргэ, тэрээһин үлэтигэр өйөбүл буолбут дьоҥҥо управление Бочуотунай грамоталарын туттарда.
Инбэлииттэр улуустааҕы уопсастыбаларын бэрэссэдээтэлэ Тамара Пермякова улуус баһылыгар Дмитрий Тихоновка, спортсменнарга, кинилэр төрөппүттэригэр, чугас дьонноругар, ыспартакыйаадаҕа кыттыы үлэтин сүрүннэспит, тэрийсбит успуорт управлениетыгар, улуус дьаһалтатын үлэһиттэригэр, биэлсэр Иван Пивоваровка, пресс-сулууспа, хаһыат үлэһиттэригэр махтанна.
Алена Докторова