Дьон олоҕун тупсарарга туһуламмыт бырайыактар олоххо киллэриллэллэрин биһириибит

Владимир Птицын, Арассыыйа үтүөлээх экэнэмииһэ:

 

Арассыыйа Бэрэсидьиэнэ Владимир Путин Федеральнай мунньахха Анал этиитигэр бүддьүөттэн саҕалаан дьон олоҕор кэккэ суолталаах боппуруостарга тохтоото.

Билиҥҥи кэмҥэ оскуолаларга хапытаалынай өрөмүөн көдьүүстээхтик ыытыллар буоллаҕына, кэлэр сыллартан уһуйаан дьиэлэригэр өрөмүөннэри ыытарга бырагыраама оҥоһуллуохтааҕын таарыйда. Тендергэ кэмчилэммит үп-харчы ити эбийиэктэри үбүлээһиҥҥэ туһаныллыаҕа. «Ыраас уу» федеральнай бырагыраама салгыы тыа сирин эмиэ хааччыйарга туһуланыаҕа, онон дьоммут-сэргэбит ыраас иһэр уунан хото хааччыллыахтара. Онон итинэн сэдиптээн туһаныллыбыт ууну ыраастыыр кыахтаах канализация коллекторын тыа сиригэр киллэрэрбит наадалаах буолан тахсар.

Владимир Путин олохпут уйгутун тупсарыыга туһуламмыт уонунан хайысхалаах национальнай бырайыактарын кэҥэтэргэ этиини киллэрдэ. «Дьиэ кэргэн», «Арассыыйа ыччата», «Уһун үйэлээх уонна көхтөөх олох», «Каадырдар» диэн саҥа бырайыактар саҕаламмыттарын эттэ. Онон Дойдубут салайааччытын кэскиллээх соруктарын олоххо киллэрэригэр эрэллээхпит, үлэтин-хамнаһын биһириибит.