Мэҥэ Хаҥалас улууһун биир кытыы нэһилиэгэ, Уус Алдан улууһун кытта кыраныыссалаһар Дойдуунускай нэһилиэгэр 80 киһи олорор.
2021 с. ахсынньы 13 күнүгэр Олег Николаевич Кычкин баһылыгынан талыллан үлэлиир. Солбуйааччыта ‒ Алексей Эдуардович Дьяконов.
Оскуола-саадка 13 оҕолоохтор, ол иһигэр үөрэнээччитэ ‒ 6. Оскуола дириэктэрэ Зоя Христофоровна Ефимова.
ОДьКХ начаалынньыга Николай Николаевич Александров, кэлэктиип сэттэ үлэһиттээх үлэлии-хамсыы сылдьаллар.
Быйылгы сылга 3 мгб-таах хочуолунай тутуутун саҕалааннар, хочуол аҕалыллан хомуллан бүтэн эрэр. «Техсервис» тэрилтэ (салайааччы Василий Захаров), ОДьКХ үлэһиттэрэ турбалары, теплотрассаны бүрүйбүттэр. Бу үлэни аны саас муус устартан саҕалаан ситэрэр былааннаахтар.
Уулусса сырдатыытын ситимин өрөмүөннээн, лаампаларын алдьаммыттары уларытан оҥорбуттар. Олохтоох көҕүлээһини өйүүр бырагыраамаҕа киирсэннэр ыһыахтыыр сирдэрин саҥардыбыттара. Бу курдук үлэ-хамнас былаан быһыытынан баран иһэр.
Ыччат лиидэринэн Сардаана Прокопьевна Дьяконова талыллан үлэтин сэргэхтик саҕалаан эрэр эбит. Кини көҕүлээһининэн «Чөл олох, чэгиэн турук» нэһилиэк тэрилтэрин икки ардыларыгар успуорка күрэхтэһии ыытылынна. Онно волейболга, остуол тенниһигэр, дартска, ох саанан ытыыга, хабылыкка, хаамыскаҕа күрэхтэспиттэр. Эрийсиилээх күрэхтэһии түмүгүнэн оскуола бастакы, ОДьКХ иккис, дьаһалта хамаандалара үһүс миэстэ буолбуттар.
Ыччаттара 14-лэр. Бары үлэҕэ көхтөөхтүк кытталлар. Күһүн аҕам саастаахтарга Варвара Ноговицынаҕа, Светлана Кычкинаҕа, Карл Варламовка мастарын хайытан, сааһылаан биэрбиттэр. Идэһэҕэ икки ыалга Григорий Кычкин‒Дьяконовка, Мария Никитинаҕа көмөлөспүттэр. Байыаннай дьайыыга кыттыылаахтарын дьонноругар Аида Кычкинаҕа, Мария Никитинаҕа муус ылан таһааран дьаарыстаан биэрбиттэр. Муҥха балыгыттан кинилэргэ итиэннэ кырдьаҕастарыгар өлүүлээн бэрсибиттэр. Дойдуунускайдар өйөһөн, инникигэ эрэллээхтик үлэлии-хамсыы олороллор.
Мария Захарова.
