Тохсунньу 20 күнүгэр Мэҥэ Хаҥалас улууһун баһылыга Дмитрий Тихонов 2023 сыллаах үлэтин отчуотун Хапчаҕайтан саҕалаата. Манна улуус управлениеларын, тэрилтэлэрин салайааччылара, Ил Түмэн дьокутаата, Сис кэмитиэт бэрэссэдээтэлэ Андрей Находкин, Уус Алдан Бороҕоннооҕу уокуругуттан Ил Түмэн дьокутаата Геннадий Васильев, улууспут дьокутааттарын сэбиэтин бэрэссэдээтэлэ Иннокентий Андросов кыттыыны ыллылар.
Нэһилиэк баһылыга Олег Кычкин иилээн-саҕалаан ыытта.
Дмитрий Иванович 2023 сылга улууска ыытыллыбыт үлэни-хамнаһы сиһилии сырдатта.
Нэһилиэнньэ кыттыыта көхтөөх. Элбэх хайысхалаах култуура киинин дириэктэрэ Анна Харитонова, оскуола-саад дириэктэрэ Зоя Ефимова, кыра оҕотун көрөн олорор дьиэ хаһаайката Альбина Кычкина, бэтэринээр Анна Скрябина, дьиэ хаһаайката Светлана Слепцова, оскуола-саад иитээччитин көмөлөһөөччүтэ Туяра Бурцева, ОДьХХ нэһилиэктээҕи учаастагын хачыгаара Георгий Слепцов, электрик Петр Харитонов кыһалҕалаах боппуруостарын туруорустулар, этиилэрин киллэрдилэр.
Дойдуунускайга чоҕунан оттуллар хочуолунай тутуллан быйыл үлэҕэ киллэриллиэхтээх. Ититии систиэмэтигэр холбонууга, айан суолун чөлүгэр түһэрии үлэтэ салгыы ыытылларыгар, култуура уонна успуорт эстэпиэтэтин графигар, култуура киинигэр эбии штат, хореограф наадатын, тыа хаһаайыстыбатын граннарыгар, сир үлэтигэр исписэлиис наадатын, агростартапка саҥа саҕалыыр пиэрмэр бырагырааматын быһааран биэрэргэ, оттуур сири кэҥэтиигэ, сүөһүгэ көрүллэр көмө харчы, сүөһү хаанын тупсарыыга тастан оҕуһу атыылаһыы, түргэн интернет ситимин тардыыга, үөһэ дэриэбинэҕэ уу быһытын оҥорууга, «Азия оҕолоро» оонньууларга кыттар оҕолорго көмө боппуруостара турдулар. Салайааччылар бары киирбит боппуруостарга толору быһаарыылары биэрдилэр. Норуот талбыт дьокутааттара үлэлэрин сырдаттылар.
Улуус баһылыга Дмитрий Тихонов анал байыаннай дьайыыга сылдьар биир дойдулаахтарбытыгар тиэрдиллэр көмөлөргө көхтөөх кыттыыны ылалларыгар олохтоохторго махталын тиэртэ.
Отчуоту 30 киһи иһиттэ, үлэни үчүгэйинэн сыаналаатылар.
Марелла Баишева.
