Бүгүн, кулун тутар 11 күнүгэр, Догдоҥо уонна Моорук нэһилиэктэригэр чоҕунан оттуллан олорбут хочуолунайдар оннуларыгар аныгылыы тутуулаах гааһынан оттуллар саҥа модульнай хочуолунайдар үлэҕэ киирэр үөрүүлээх тэрээһиннэрэ буолла.
Саҥа хочуолунайдар дойду бэрэсидьиэнэ олохтообут хомунаалынай хаһаайыстыба инфраструктуратын саҥардыы бырагырааматын чэрчитинэн үлэҕэ киирбиттэр. Бөкөҕө саҥа модульнай хочуолунайга 2 олорор дьиэ уонна 8 социальнай эбийиэк, Моорукка 5 олорор дьиэ уонна 5 социальнай эбийиэк холбоммуттар.
Үөрүүлээх тэрээһиҥҥэ улуус баһылыга Дмитрий Тихонов, СӨ «Олох-даһах, хомунаалынай хаһаайыстыба» судаарыстыбаннай унитарнай тэрилтэтин генеральнай дириэктэрэ, Ил Түмэн дьокутаата Виталий Чикачев, СӨ «ОДьКХ» судаарыстыбаннай унитарнай тэрилтэтин тутуллар эбийиэктэрин дириэксийэтин дириэктэрэ Михаил Соловьев, «Олох-дьаһах, хомунаалынай хаһаайыстыба» ГУТ Мэҥэ Хаҥаластааҕы салаатын дириэктэрэ Иннокетий Яковлев, нэһилиэк баһылыктара Петр Сивцев, Айисен Игнатьев, нэһилиэктэр олохтоохторо, үөрэх, социальнай тэрилтэлэр бэрэстэбииттэллэрэ кыттыыны ыллылар.
Тэрилтэлэри, дьон олорор дьиэлэрин сылааһынан хааччыйар эбийиэктэри арыйыы үөрүүлээх түгэнигэр үгэс быһыытынан сиэри-туому тутуһан, сыт таһааран, аал уоту айах тутан алҕаатылар, эҕэрдэ истиҥ тыллара этилиннилэр. Олох-дьаһах, хомунаалынай хаһаайыстыба эйгэтигэр эҥкилэ суох үтүө суобастаахтык үлэлээн кэлбит салайааччыларга, үлэһиттэргэ: Роман Морозовка, Юрий Григорьевка, Николай Морозовка, Иван Морозовка, Анатолий Карамзиҥҥа, Ньургуйаана Ивановаҕа, Прокопий Новгородовка, Кирилл Поповка (Догдоҥо), Еремей Жирковка, Артем Иннокентьевка, Дмитрий Скрябиҥҥэ, Тимофей Сосиҥҥа, Петр Иннокентьевка үөрүүлээх быһыыга-майгыга тэрилтэ, министиэристибэ итиэннэ муниципальнай оройуон грамоталарын, бэлиэлэрин, махтал суруктарын туттардылар.
Саҥа эбийиэктэр бэлиэ күлүүстэрэ салайааччыларга – Догдоҥо нэһилиэгэр ОДьХХ учаастагын начаалынньыгар Роман Морозовка, Моорукка учаастак маастарыгар Еремей Жирковка туттарылынна.
«Олох-дьаһах, хомунаалынай хаһаайыстыба» СУТ генеральнай дириэктэрэ Виталий Чикачев эппитинэн, улууска хомунаалынай хаһаайыстыба инфраструктуратын саҥардыы үлэтэ салҕанар.
Тыйыс кыһыннаах, кылгас сайыннаах дойдубутугар олохпут сайдыы суолунан субу курдук тупсан истин!
Елизавета Неустроева.
