Майаттан “Түмэн” уопсастыбаннай холбоһук бэтэрээннэрэ Дьокуускайга Губинскай уокурук бэтэрээннэрин ыҥырыытынан муус устар 14 күнүгэр доҕордуу көрсүһүүгэ баран кэллилэр.
Губинскай уокурукка 40000 киһи олорор эбит. Бэтэрээннэр күн аайы иискэ, байаанынан ырыаҕа, үҥкүүгэ, остуол оонньууларыгар, хаалыктаах хаамыыга, мээчиккэ араспысаанньанан сылдьан дьарыктаналлар, өрөбүлгэ 2 чаас устата Дьокуускайдааҕы уу тырааныспарын институтугар успуорка эрчиллэллэр эбит. Салайааччылара Светлана Степанова Майаттан төрүттээх буолан дойдутун дьонун кытта сибээстэһэ турар. Кини Губинскай уокурук бэтэрээннэрин салайарын сэргэ, Дьокуускай куорат 45 сыллааҕыта тэриллибит «Сайсары” дьахталлар ырыа ансаамбылын салайааччытынан 2008 сылтан айымньылаахтык үлэлээн элбэх ситиһиилээхтэр.
Майаттан Федора Наумова салайааччылаах Александр Андреев, Дмитрий Колосов, Антонина Петрова, Татьяна Попова, Розалия Терентьева, Галина Ксенофонтова, Дария Денисова, Зоя Иванова, Лоомтукаттан Виктор Корякин састааптаах хамаанда тэриллэн тиийдэ.
“Набережнай” эргиэн киинигэр Губинскай уокурук бэтэрээннэрэ үлэлиир хосторугар майалары итии чэйдээх сандалы тула олордон ирэ-хоро сэһэргэстилэр. Бу кэннэ манна хабылык, хаамыска көрүҥнэригэр күрэхтэһэн тэҥнэстилэр. Онтон Дьокуускайдааҕы уу тырааныспарын институтун успуорт саалатыгар волейболга кииристилэр. Күрэхтэһиигэ икки өттүттэн: куораттан Мария Васильева, Августина Исакова, Майаттан Федора Наумова судьуйанан үлэлээтилэр. Түмүккэ Майалар мэтээлинэн уонна Дьокуускай куорат 390 сылынан тахсыбыт бочуоттаах гражданнарын кинигэтинэн наҕараадаланнылар. Икки өттүттэн эҕэрдэлэһэн ырыа-тойук ылланна, хоһоон этилиннэ, оонньуу оройуттан ылылынна. Куораттар хас биирдиилэригэр малина барыанньатын кэһиилээтилэр. Түмэннэр олохтоохтору кытта доҕордуу сыһыаны олохтоон, салгыы бииргэ үлэлэһиэх буолан үөрэн-көтөн кэллилэр.
Улуус дьокутаата, “Түмэн” сүбэтин чилиэнэ Иван Пивоваров бэйэтин массыынатынан дьонун босхо илдьэн-аҕалан үөрүүлэрин үрдэттэ, махталларын ылла.
Марелла Баишева.
