«Тыа сиригэр билигин сүөһүлээх-астаах эрэ киһи олорор» диэн бигэ санааны тутуһар Хара нэһилиэгин олохтооҕо Дмитрий Григорьев.
Кини кэтэх хаһаайыстыбата биир эрэ ынахтан саҕалаан улам кэҥээн барбыта. Григорьевтар Үрдьүҥэхтээх кыбаарталга биир бастакынан олохсуйбут ыал буолаллар. Дьиэ кэргэн 3 уолаттарынаан сайын оттоон, үчүгэй дьыл сүөһүлэрэ этэҥҥэ кыстыыр отун булуналлар, арыт атыылаһан эбинэллэр. Кыбаарталга соҕотох сүөһүлээх ыал буоланнар, чугас баар дүөдэҕэ уолаттарынаан бэйэлэрэ ойбоннорун тэһэн ынахтарын уулаталлар.
Дмитрий Денисович быйыл саас Хара нэһилиэгин дьаһалтатын сүбэтинэн, улуустааҕы социальнай көмүскэл управлениетын нөҥүө кэтэх хаһаайыстыбаны сайыннаарыы хайысхатыгар чааһынай хотон туттарга 200 тыһыынча солкуобайдаах социальнай хантараак көмөтүн ылбыта. Хотону сайын бэйэтин бырайыагынан, дьиэ кэргэн уонна аймахтарын күүһүнэн көмөлөөн, аныгы матырыйаалынан туппуттара.
Билиҥҥи туругунан хотоҥҥо 4 ынах, 2 ньирэй уонна хотон сылааһын туһанан 10-ча куурусса кыстыыллар. «Хотоммут тутуута хайдаҕын быйыл кыһын билиэхпит, билиҥҥитэ этэҥҥэ, сылаас», — диир хаһаайын.
Дмитрий Григорьев аҕыйах сыллааҕыта эмиэ маннык социальнай хантараак өйөбүлүгэр тиксэн, от охсор уонна мунньар ылыммыта хаһаайыстыбаҕа туһалара улахан.
«Кэтэх хаһаайыстыбаны сайыннарыыга социальнай хантараак олус көмөлөөх эбит», — диир Дмитрий Денисович итиэннэ, түгэнинэн туһанан, нэһилиэгин дьаһалтатыгар уонна улуустааҕы социальнай көмүскэл управлениетыгар махталын тиэрдэр.
