Лилия Расторгуева,
Мэҥэ Хаҥаластааҕы сокуоннай саастарын ситэ илик оҕолорго социальнай-реабилитациялыыр киин полустационарнай салаатын сэбиэдиссэйэ:
— Бүгүн, ахсынньы 22 күнүгэр, Ил Дархан Айсен Николаев Ил Түмэн (Судаарыстыбаннай Мунньах) дьокутааттарыгар, өрөспүүбүлүкэ Бырабыыталыстыбатыгар уонна уопсастыбаннаска Анал этиитин оҥордо. Кини ааһан эрэр сылга ыытыллыбыт үлэ-хамнас төһө көдьүүстээхтик барбытын, түмүктэрин сырдатта, үүнэр сылга былааннары, сыалы-соругу ыйда.
Дойдубут Бэрэсидьиэнэ Владимир Путин кэлэн иһэр 2024 сылы Дьиэ кэргэн сылынан биллэрбитэ. Оттон бүгүн Ил Дархаммыт Айсен Николаев үүнэр сылы Оҕо сылынан биллэрбитин, бу икки сыл дьүөрэлэспитин өрөспүүбүлүкэ бары олохтоохторо, ол иһигэр биһиги, социальнай эйгэҕэ үлэлии сылдьар дьон, олус диэн үөрэ иһиттибит.
Дьиэ кэргэн уонна оҕо, биллэн турар, быстыспат, биир ситимнээхтэр. Оҕо – дьиэ кэргэн, нэһилиэк, улуус, өрөспүүбүлүкэ, бүтүн дойдубут кэлэр кэскилэ. Кини туох өйдөөх-санаалаах, төһө сайдыылаах буоларыттан, хайдах ыччаты иитэн таһаарарбытыттан дойдубут инникитэ, сайдыыта улахан тутулуктаах.
Оҕо туһугар кыһамньы – үүнээри турар сыл сүрүн соруга. Оҕо эт-хаан өртүнэн сайдыытыгар эрэ буолбакка, уйулҕата чөл туруктаах буолуутугар, билиини ылыытыгар, үөрүйэхтэргэ, үлэҕэ, идэҕэ уһуйуллуутугар, иллэҥ кэмигэр дьарыгар улахан болҕомто ууруллуоҕа.
“Олох ыарахаттарын көрсүбүт хас биирдии киһи аҥардас өйөбүлү эрэ буолбакка, кини уонна кини дьиэ кэргэнэ социальнай өртүнэн тирэхтээх буоларыгар туһуланар арыаллааһыны ылыахтаах“, — диэн Ил Дархаммыт Анал этиитигэр тоһоҕолоон бэлиэтээтэ. Кэлэр сылга ыытыллар үлэ биир сүрүн хайысхатынан социальнай тулаайахсыйыыны сэрэтии буолар. Онуоха туһаайыллар дьаһаллар, тэрээһиннэр ыытыллыахтара. Ордук кыра дохуоттаах, элбэх оҕолоох ыалларга уонна, биллэн туран, анал байыаннай дьайыыга дойдубутун көмүскүү сылдьар буойуттарбыт чугас дьонноругар болҕомто күүһүрүө.
Ил Дархаммыт Анал этиитигэр туруорбут соруктара үүнэр сылга барыта туолалларыгар биһиги, оҕо, дьиэ кэргэн туруктаах буолуутугар үлэлии сылдьар дьон, бигэ эрэллээхпит.