«Дьиэ кэргэн – дьол биһигэ» ураты истиҥ көрсүһүү буолла

Муус устар 13 күнүгэр “Лира” банкеттыыр саалаҕа Майа дьахталларын сүбэтин тэрийиитинэн “Дьиэ кэргэн – дьол биһигэ” диэн хатыламмат ураты истиҥ уонна дириҥ суолталаах көрсүһүү ыытылынна.

Тэрээһини дьиэ кэргэнинэн олохтоох оҥорон таһаарыыны сайыннарааччы, оҕону дьиэ кэргэҥҥэ иитиигэ араас хайысхалаах бырайыактар ааптардара Николь Егорова иилээн-саҕалаан ыытта. Ыалдьыттары кытта кэпсэтиини түстээтэ.

Бастакынан эдэр урбаанньыт, блогер, хаартыскаҕа түһэрээччи Кэрэли Кириллина үһүс кылааска үөрэнэр уолунуун Айылханныын кэпсэтиини саҕалаатылар. Кэрэли кэргэнин Тимири кытта 2017 сылтан хаартыскаҕа түһэриинэн, дьиэ кэргэн бизнеһинэн дьарыктаналлар эбит. Өрүү бииргэ үлэлиир буоланнар, бэйэ-бэйэҕэ сыһыаннарын түөрт оруолунан араарбыттар: ийэ-аҕа оруола, бииргэ үлэлиир дьон сыһыана, табаарыстыылар сыһыаннара уонна эр киһи дьахтары кытта сылаас сыһыана. Ол оруолларын чопчу өйдөөн, үлэни үлэ кэмигэр быһаарсаллар эбит. Харчы өттүгэр дохуот биир буолан, бастаан ийэ киһи уопсай бүддьүөтү тутан испит. Ол эрээри харчыны эр киһи тутара ордук эбит диэн санааҕа кэлбиттэр. Эр киһи булар-талар, кини оҥорбут харчытын барытын биэрэн иһэр буоллаҕына, уота умуллан, була-тала сатыыр кыаҕа уостан хаалар диэн этэр.

Салгыы “Сахат” уол оҕо оскуолатын уһуйааччыта, “Сахалыы” саха тылын үөрэтэр сыһыарыыны төрүтээччи, артыыс, уопсастыбанньык Ньургун Бэчигэн уонна кини олоҕун аргыһа, илиҥҥи үҥкүү оскуолатын төрүттээччи, трайбл хайысханы Дьокуускайга сайыннарааччы, үҥкүүһүт, блогер Лилия Бэчигэни көрүстүбүт. Лилиялаах Ньургун төрдүлэрэ Мэҥэлэр эбит (Лилия Өлөчөй, Ньургун Хорообут). Хайдах билсэн ыал буолбуттарын туһунан кэпсээтилэр. Москуба куоракка олорор нууччалыы иитиилээх Лилия уонна балаҕаны ордорор сахалыы куттаах “Тыгын Дархан” Ньургун. Кинилэр сыһыаннарыттан, “Сахалыы” диэн саха тылын үөрэтиэн, билиэн баҕалаахтарга олус туһалаах сыһыарыы үөскээн тахсыбыт. Бэчигэннэр тус олохторун холобуругар тирэҕирэн бэйэ-бэйэҕэ итэҕэйсиини, эр киһи киэҥ көҕүстээх буолара наадатын, дьиэ кэргэн биир сыаллаах буолуутугар тохтоотулар. Лилия: “Жизнь это путь, чтобы эта путь длилась долго и красиво, нужно ее проживать ярко с любимым человеком»,- диэн түмүктээтэ.

Бу кэпсэтиилэри барытын сүрүннүүр, дириҥник толкуйдатар ыалынан, уол уонна кыыс оҕо оскуолаларын, уһуйааннарын төрүттээччилэр Светлана, Анатолий Бурнашевтар буоллулар. Анатолий билигин олоххо баар кыһалҕаларга тохтоото. Оҕо иитиитигэр бэйэтин санааларын, киэҥ ис хоһоонноох философскай толкуйдарын үллэһиннэ. Кэргэнэ Светлана элбэх оҕолоох дьиэ кэргэн ийэтэ буоларынан, олоххо туттар ньымаларын киһиэхэ тиийэр гына боростуойдук ситэрэн-хоторон кэпсээни эбэн биэрдэ. Саалаҕа олорооччулартан элбэх ыйытыылар киирдилэр. Оҕо иитиитигэр сүбэ ыллылар. Дьэ ирэн-хорон, айах аһыллан кэпсэтэн иһэн, бириэмэбит кырыымчыгынан биэчэр түмүктүүр чааһа биллэрбэккэ тиийэн кэллэ.

Түмүккэ Майа дьахталларын сүбэтин салайааччы Екатерина Романова кэлбит ыалдьыттарга махтанан сибэкки дьөрбөтүн, өйдөбүнньүк бэлэхтэри туттарда. Бу көрсүһүүттэн бары элбэҕи билэн, санаалыын сааһыланан, астынан тарҕастыбыт.

 

Елизавета Неустроева.