Дьабыылга олохтоохтор гаас ситимэ хаһан тардылларын сурастылар, «Ыраас уу» бырагыраама олоххо киллэриллэрэ уолдьаспытын бэлиэтээн эттилэр

Олунньу 13 күнүгэр  Саха Өрөспүүбүлүкэтин бырабыыталыстыбатын 2023 сыллаах үлэтин отчуота Дьабыыл нэһилиэгиттэн саҕаланна.

Бастакы бөлөҕү өрөспүүбүлүкэ  экэниэмикэтин миниистирэ Петр Попов салайан илдьэ сылдьар. Улуустан баһылык Дмитрий Тихонов, управлениелар, тэрилтэлэр салайааччылара арыаллыы сылдьаллар.

Нэһилиэк баһылыга Дмитрий Петров бөлөх састаабыгар киирбит  бырабыыталыстыба салайааччыларын билиһиннэрдэ уонна мунньаҕы  иилээтэ-саҕалаата.

Миниистир Петр Попов дакылаатыгар ааспыт сылга нэһилиэнньэ туруорбут 6 боппуруоһуттан 5 туолбутун эттэ.

Нэһилиэккэ тыа хаһаайыстыбатын  исписэлииһэ Василий Березкин сылгыны күрүөлээһин сокуона ылыллаары турарыгар туох үлэ барарын, балбаах сокуона тыа сирин дьонугар сөбө суоҕун, бэйдиэ сылдьар ыттарга туох үлэ барарын ыйытта.

Үлэ бэтэрээннэрэ  мунаарар  боппуруостарынан көхтөөхтүк кытыннылар. Иннокентий  Киренскай гаас ситимэ тардыллара, скважина боппуруоһа  “Ыраас уу»  бырагыраамаҕа киирэрэ уолдьаспытын, үүт сыанатын үрдэтэ туралларыгар  махтанна итиэннэ туохха барытыгар  сыана үрдүү турарынан  үрдүү турара наадатын,  көрүүчэй сыаната үрдүгүн, ынахха 35 тыһыынча солкуобай харчы бэриллэрин  сөбүлээбэтин, ньирэйдээх ынахтар сыһыыга сылгы курдук сылдьаллара үчүгэйэ  суоҕун, үүт туттарыыта аччыырын, ити боппуруоска өссө үлэ барыан наадатын ыйда.

Саха ынахтарын иитэр Дьулустан Брызгалов  35 тыһыынча солкуобай харчы бэриллэрэ  киниэхэ көдьүүстээҕин, төрүт дьарыкпыт туһугар, үлэ киһитин өрө тутарга оҕону уһуйаантан саҕалаан иитэргэ,  ыанньыксыт ыстаатыһын өрө таһаарарга  уоттаах-төлөннөөх тыл эппитин дьон-сэргэ дохсуннук таһынан өйөөтө.

Галина Стручкова Афанасий Максимов оҥорон таһаарар  тэрилтэтин үлэтин сураста,  уһуйаан, оскуола оҕолоро сахалыы тылларын өрө туталлара наадатын,  балбаах сокуона, бэйдиэ сылдьар ыт иитиитин сокуоннара сыыһатын эттэ, гаас кэлэрэ ырааҕынан ОДьХХ хочуолунайдарыгар модульнай оһохтору туруоран  барыларын киин ититиигэ холбуурга, алаастарга, сайылыктарга барар  суоллар оҥоһууларыгар көмө наадатын эттэ. Наталья Поисеева ардах түһэрэр сөмөлүөт  үлэтин кэрэхсээбитин эттэ.

Иван Борисов “Газгольдер» оһох,  “Ирбистэр»  сыаналара ыараханын, муоста тутуутун, алмаас туһунан боппуруостары көтөхтө.

Василий Федоров сиэрдийэ кэрдиитин нэһилиэккэ биэрэргэ, алмаастан  бырыһыан көрүллэрин туруорсуохха,  нэһилиэнньэ доруобуйатын быраас кэлэн көрөн барара, нэһилиэктэн вышкалары тэйиччи туруорар наадатыгар тохтоото.

Бөлөх салайааччыта, миниистир Петр Иванович тус бэйэтин уонна бырабыыталыстыба чилиэннэрин ааттарыттан мунньахха кэлбит дьоҥҥо махтанна. Салгыы Үөрэх министиэристибэтин Махтал суругун сүҥкэн кылаатын иһин физика учуутала  Фекла Аммосоваҕа, тыа хаһаайыстыбатын министиэристибэтин  өр  сыллаах үтүө суобастаах үлэтин иһин Махтал суругун Лев Борисовка туттарда.

Дмитрий Петров киирбит этиилэринэн икки өттүттэн үлэлиэхпит диэн туран дьонугар-сэргэтигэр махтанна.

Отчуоту истэ 52 киһи кэлбит.

Марелла Баишева.

Читайте дальше